اڈپی،12/اپریل (ایس او نیوز) لاک ڈاؤن کی مدت ختم ہونے یا پھر درمیان میں رعایت ملنے پر اڈپی ضلع میں پھنسے ہوئے لو گ باہر جانے یا ضلع سے باہر پھنسے ہوئے یہاں واپس لوٹ آنے کی اگر تیاری کررہے تھے تو پھر ان کے لئے ایک بری خبر ہے۔کیونکہ ضلع ڈپٹی کمشنر جگدیش نے اخباری بیان جاری کرتے ہوئے کہا ہے کہ اڈپی ضلع سے ملنے والی چاروں اضلاع کی سرحدوں کو مکمل سیل کردیا گیا ہے۔

ضلع شمالی کینرا، ضلع جنوبی کینرا، ضلع شیموگہ اور ضلع چکمگلوروکی سرحدیں اڈپی سے ملتی ہیں۔ ڈپٹی کمشنر نے سرحدوں کوپوری طرح سیل کرنے کے احکامات جاری کرتے ہوئے کہا ہے کہ لاک ڈاؤن کی مدت ختم ہونے کے دن قریب آتے دیکھ کر ضلع کے اندر باہر پھنسے ہوئے لوگ نقل مکانی کرنے کے منصوبے بنانے کی اطلاعات ضلع انتظامیہ کو موصول ہوئی تھیں، اس لئے کورونا وائرس کی وباء پر قابو پانے میں کامیابی ملنے تک نقل مکانی کی اجازت نہ دینے کے لئے سرحدوں کو مکمل طور پر بند کرنے کی سخت کارروائی کی گئی ہے۔