اڈپی: پرائیویٹ بس کے ذریعہ مسافروں کوممبئی لے جانے کی کوشش کو پولیس نے کردیا ناکام
اڈپی 5/ مئی (ایس او نیوز) کووِڈ پروٹوکول کی خلاف ورزی کرتے ہوئے پرائیویٹ بس کے ذریعہ ممبئی لے جانے کی کوشش کو پولیس نے ناکام بنا دیا، اور بس ڈرائیور عبدالبشیر کے خلاف کیس درج کرتے ہوئے اسے گرفتار کرلیا۔
موصولہ رپورٹ کے مطابق کل 4 مئی کو ایک پرائیویٹ بس کلاک ٹاور کے پاس پارک کی ہوئی تھی جس کا مقصد کووِڈ مریضوں کو اسپتال پہنچانا بتایا گیا تھا۔ لیکن جب دوپہر 2 بجے کے قریب میونسپال کمشنر نے کووِڈ پروٹوکول پر عمل در آمد کا جائزہ لینے کے لئے دورہ شروع کیا تو دیکھا کہ KA-51 AD 5835 نمبر پلیٹ والی ایک پرائیویٹ بس میں 13 مسافر سوار تھے جنہیں ممبئی لے جانے کی تیاری ہورہی تھی۔ چونکہ سرکاری افسران سے اجازت نامہ حاصل کیے بغیرلوگوں کو ایک مقام سے دوسرے مقام لے جانا کووِڈ پروٹوکول کی براہ راست خلاف ورزی تھی، اس لئے میونسپل کاونسل کمشنر اودئے کمار نے سٹی پولیس اسٹیشن میں شکایت درج کروائی جس پر کارروائی کرتے ہوئے پولیس نے آئی پی سی کی دفعہ 269 اور کرناٹکا پینڈیمک ڈیسیز ایکٹ کی دفعہ 51 (1)(4) کے تحت بس ڈرائیور کو گرفتار کرلیا اور بس میں موجود مسافروں کو ان کے گھر بھیج دیا گیا۔