نیتراوتی ایکسپریس میں خاتون کا بیگ چرا کر چلتی ریل سے کودنے والے دو چور بھٹکل میں گرفتار
بھٹکل 2/نومبر (ایس او نیوز)تیرواننت پورم سے کُرلا ممبئی جانے والے نیتراوتی ایکسپریس کے ڈبے سے ایک خاتون مسافر کا بیگ چرانے کے بعد بھٹکل ریلوے پلیٹ فارم پر چلتی ٹرین سے کودنے اور شیرور کی طرف بھاگنے والے دو چوروں کو پولیس نے گرفتار کرلیا ہے۔
بھٹکل پولیس کی طرف سے جاری کردہ بیان کے مطابق ڈیوٹی پر تعینات پولیس اہلکاروں نے پولیس اسٹیشن کو اطلاع دی کہ دو نوجوان چلتی ٹرین سے کودنے کے بعد شیرور کی طرف پیدل بھاگ نکلے ہیں۔ بھٹکل سب انسپکٹر یوگیندر سنگھ نے ریلوے اسٹیشن پہنچ کر دیگر پولیس اہلکاروں کے ساتھ علاقے میں تلاشی مہم چلائی تو دو نوجوان مشتبہ حالت میں ایک پُل کے نیچے پائے گئے۔ ان کے پاس ایک کالے اور سفید رنگ کا بیگ تھا۔ تفتیش کرنے پر انہوں نے بتایا کہ وہ اس ٹرین میں بیندور اسٹیشن سے سوار ہوئے تھے، جس کی تصدیق ان کے پاس موجود بیندور سے کاروار تک کے ٹکٹ سے ہوگئی۔
ان دو نوجوانوں کی شناخت اپن انگڈی کے رہنے عبدالرشید (22سال) اور بنٹوال کے رہنے والے اسحاق (19سال) کے طورپر کی گئی، جس کے بعد مزید پوچھ تاچھ کے لئے ریلوے پروٹیکشن فورس کے آؤٹ پوسٹ میں لایا گیا۔ تفتیش کے دوران بیگ کے اندر دس ہزار روپے مالیت کا ایک سیام سنگ موبائل فون، 23ہزار روپے نقد،ایک دستی گھڑی، پیان کارڈ اور مندر کو عطیہ دی گئی ایک رسید دستیاب ہوئی جس سے پتہ چلا کہ یہ بیگ ستیہ بھما مینن کا ہے۔ بیگ کے اندر چھتری اور کچھ دوائیاں بھی موجود تھیں۔ملزمین نے بتایا کہ انہوں نے بیندور اسٹیشن سے ٹرین میں سوار ہونے کے بعد اے سی بوگی کی برتھ نمبر ۰۵ سے یہ بیگ اڑایا تھا۔ جب سب انسپکٹر کاروار نے ٹرین میں ڈیوٹی پر موجود ٹی ٹی ای سے رابطہ قائم کیا تو معلوم ہواکہ کسی بھی مسافر نے بیگ چوری ہونے کی شکایت نہیں کی ہے۔
پولیس نے بیگ سے ملنے والے فون کو سوئچ آن کیااور اس پر موجود مسڈ کال نمبر پر رابطہ قائم کرنے پر شیام نے ایک شخص نے فون اٹھایا اور اس نے بتایا کہ ٹرین میں اس کی ساس ستیہ بھما سفر کررہی ہیں اور ان کی بیگ گم ہوجانے کی شکایت درج کی گئی ہے۔ جب ٹرین گوا اسٹیشن پر پہنچی تو وہاٹس ایپ مسیج کے ذریعے بیگ چوری ہونے کی شکایت بھی موصول ہوئی۔
بھٹکل ٹاؤن پولیس اسٹیشن میں کیس درج کرتے ہوئے دونوں ملزمین کو گرفتار کیا گیا اور پھر انہیں عدالت میں پیش کیا گیا۔مزید تحقیقات سے پتہ چلا کہ ملزم نمبر 2 اسحاق ایک عادی مجرم ہے۔ اس کے خلاف کیرالہ کے شورنور میں ڈاکہ زنی کا کیس درج ہے۔اس کے علاوہ 30اکتوبر 2019کومنگلوروریلوے اسٹیشن پر بھی ٹرین کے اندر خاتون کے گلے سے سونے کی چین اڑانے کا کیس بھی درج کیا گیا ہے۔
