بھٹکل کے ہریجن کیری میں مکینوں کو ہراساں کرنےکے الزام میں ایک فرد گرفتار : ملزم کے گھر سے کچھوے اور کچھووں کے انڈے برآمد
بھٹکل:6؍ اپریل(ایس اؤ نیوز)تعلقہ کے ہریجن کیری میں پولس نے ایک شخص کو گرفتار کرلیا جس پر اُسی علاقہ کے مکینوں نے مسلسل ہراساں کرنےکاالزام عائد کیا تھا۔ گرفتاری پیر کی شام کو پیش آئی۔ اس موقع پر جب بھٹکل تحصیلدار ایس روی چندرا اپنے عملہ کے ساتھ پنچ نامہ کرنے ان کے مکان پہنچےتو حیرت انگیز طور پر ان کے مکان سے کچھوے اور کچھووں کے انڈے برآمد ہوئے۔
پتہ چلا ہے کہ ہریجن کیری کے مکینوں نے علاقہ میں مقیم منجو نامی فرد پر الزام عائد کیا تھا کہ وہ میونسپالٹی ملازمین کو انفرادی طور پر ہراساں کرتا ہے۔ شکایت میں بتایا گیا تھا کہ عورتیں جب نہانے جائیں یا ضروریات سے فارغ ہونےجائیں تو ان کاپیچھا کرتےہوئے کپڑے کھول کر نازیبا کرتوت کرتاہے۔ ہریجن کیری میں پینے کے پانی کو سپلائی کرنے والے پائپ کو کاٹ کر پانی بند کرتاہے۔ پہاڑی علاقے کے ٹیلوں کو کھود کر پہاڑکےکنارے بسے مکینوں میں خوف پیدا کررہا ہے۔ اس طرح اپنی مختلف کرتوتوں کی وجہ سے ہریجن کیری میں خوف وہراس کا ماحول پیدا کرنےو الے شخص کے خلاف مناسب کارروائی کا مطالبہ لےکر مکینوں نےپولس تھانےمیں شکایت درج کی تھی۔ پولس نے کاروائی کرتے ہوئے ملزم کو اپنی تحویل میں لے لیا۔
گھرمیں کچھوے اور انڈے :پیر کی شام تحصیلدار روی چندر ا جب ملزم کے گھر پنچ نامہ کے لئے پہنچے تو انہیں ایک زندہ کچھوا اور کچھ کچھووں کے انڈے نظر آئے۔ تحصیلدار نے فوری محکمہ جنگلات کو واقعے کی جانکاری دی اور ان سب کو اپنی تحویل میں لیتے ہوئے محکمہ فوریسٹ کے حوالے کردیا۔
بھٹکل رینج فوریسٹ آفسر (آر ایف اؤ) سویتا دیواڑیگا نے بتایا کہ جو کچھوے اور کچھووں کے انڈے برآمد ہوئے ہیں، اس تعلق سے جانچ کی جارہی ہے۔