بھٹکل سرکاری اسپتال کے گم شدہ ڈاکٹر کا پتہ چل گیا
بھٹکل، 21 / اکتوبر (ایس او نیوز) بھٹکل تعلقہ اسپتال میں امراض جلد کے ماہر ڈاکٹر اومیش ایچ ٹی جو گزشتہ ایک ہفتے پہلے اچانک لاپتہ ہوگئے تھے ، ان کا پتہ چل گیا ہے اور وہ خود اپنے اہل خانہ کے ساتھ بھٹکل دیہی پولیس اسٹیشن میں حاضر ہوگئے ۔
بتایا جاتا ہے کہ 10 اکتوبر کو صبح ڈیوٹی پر جانے کی بات کہتے ہوئے گھر سے نکلنے والے ڈاکٹر اومیش شام تک گھر نہیں لوٹے اور ان کو تلاش کرنے پر کہیں سے بھی ان کی خبر نہیں ملی تو ان کی بیوی نے بھٹکل دیہی پولیس اسٹیشن میں گم شدگی کا معاملہ درج کروایا تھا ۔
پولیس نے ڈاکٹر اومیش کو تلاش کرنا شروع کیا تو معلوم ہوا کہ کنداپور، شیموگہ، بیلاری وغیرہ سے ہوتے ہوئے وہ ممبئی پہنچ گئے ہیں ۔ اس دوران خود ڈاکٹر اومیش نے اپنے والدین کو فون کرکے بتایا کہ وہ رانی بینور پہنچ رہے ہیں ۔ جس کے بعد ان کے اہل خانہ رانی بینورپہنچ گئے اور وہاں سے ڈاکٹر اومیش کو واپس لے آنے میں کامیاب ہوئے ۔
بھٹکل دیہی پولیس اسٹیشن کے سرکل انسپکٹر گوپال چندن اور پولیس انسپکٹر میور پٹن شیٹی نے ڈاکٹر اومیش شیٹی سے رابطہ قائم کیا تو انہوں نے اپنےاہل خانہ کے ساتھ پولیس اسٹیشن میں پہنچ کر اپنا بیان درج کروایا ۔ اس طرح سرکاری ڈاکٹر کی گم شدگی کی کہانی ایک اچھے موڑ پر ختم ہوگئی ۔