کولمبو، 12/ستمبر (ایس او نیوز/ایجنسی) ایشیا کپ 2023 میں پیر کو پاکستان کے خلاف ہندوستان نے رنوں کا پہاڑ کھڑا کرتے ہوئے رنوں کی بارش کردی اور جیت کے لیے پاکستان کو 50 اوور میں 357 رن بنانے کا نشان دے ڈالا۔
وراٹ کوہلی نے ایشیا کپ کے سوپر-4 راؤنڈ میں پاکستانی گیندبازوں کی دھجیاں اڑاتے ہوئے محض 94 گیندوں پر ناٹ آؤٹ 122 رن بنا ڈالے۔ اس میں 9 چوکے اور 3 چھکے شامل ہیں۔ اس سنچری اننگ کے دوران کوہلی نے ماسٹر بلاسٹر کے نام سے مشہور سچن تندولکر کے سب سے تیز 13 ہزار رن پورا کرنے کے عالمی ریکارڈ کو بھی توڑ ڈالا۔ دراصل سچن تندولکر نے وَنڈے کرکٹ میں اپنے 13 ہزار رن 321ویں اننگ میں مکمل کیے تھے، جبکہ کوہلی نے یہ فخر محض 267ویں اننگ میں ہی حاصل کر لیا۔ دلچسپ بات یہ ہے کہ تندولکر نے بھی اپنے 13 ہزار رن پاکستان کے خلاف ہی پورے کیے تھے۔ انھوں نے 16 مارچ 2004 کو راولپنڈی میں 330ویں میچ کی 321ویں اننگ میں ایسا کیا تھا۔ اس میچ میں سچن نے 141 رنوں کی آتشی پاری کھیلی تھی اور پاکستان کو 12 رنوں سے شکست کا سامنا کرنا پڑا تھا۔ آتشی سنچری تو کوہلی نے بھی لگا دی ہے۔
کوہلی نے پیر کو اپنے وَنڈے کرکٹ میں 47ویں سنچری پوری کر لی جو کہ سچن تندولکر سے محض 2 کم ہے۔ یعنی کوہلی جلد ہی سچن کی 49 سنچری کے ریکارڈ کو بھی توڑ سکتے ہیں۔ بلکہ جس فارم میں وراٹ نظر آ رہے ہیں، ایشیا کپ کے باقی 3 میچوں (اگر ہندوستانی ٹیم فائنل میں پہنچتی ہے تو) میں ہی وہ اس ریکارڈ کی برابری کر سکتے ہیں، یا توڑ بھی سکتے ہیں۔
بہرحال، وراٹ کوہلی نے آج ایک اور ریکارڈ اپنے نام کیا۔ دراصل انھوں نے کے ایل راہل کے ساتھ مل کر 233 رنوں کی پارٹنرشپ کی جو کہ ہندوستان کی طرف سے پاکستان کے خلاف اب تک کی سب سے بڑی پارٹنرشپ ہے۔ اس سے پہلے ہندوستان کی سب سے بڑی پارٹنرشپ کا ریکارڈ سچن تندولکر اور نوجوت سدھو کے نام تھا جنھوں نے 231 رن کی شراکت داری کی تھی۔ اگر پاکستان کی طرف سے ہندوستان کے خلاف سب سے بڑی شراکت داری کی بات کی جائے تو یہ ریکارڈ سعید انور اور اعجاز احمد کے نام ہے جنھوں نے 230 رنوں کی شراکت داری کی تھی۔
بتاتے چلیں کہ ایشیا کپ2023ءکے سوپر4 کے اس تیسرے میچ میں ہندوستان نے پاکستان کو228رنوں سے زبردست شکست دے دی ہے۔ 357رنوں کے ہدف کے تعاقب میں پاکستانی ٹیم صرف 128 رنوں پر ہی ڈھیر ہوگئی۔