کنداپور 19/جنوری (ایس او نیوز) یہاں شاستری سرکل کے قریب غیر قانونی طورپر چیتے کی کھال فروخت کرنے کے الزام میں بینگلور کی سی آئی ڈی فوریسٹ یونٹ  نے دس افراد کو گرفتار کرلیا ہے جس میں پانچ کا تعلق بھٹکل، تین کا تعلق بیندور اور ایک ایک کا تعلق ، منڈگوڈ اور  ہوناورسے ہے۔ گرفتاری کی یہ واردات جمعہ کی دوپہر کو پیش آئی۔

اطلاع کے مطابق   ڈی وائی ایس پی  ایس ایس کاشی کی رہنمائی میں پولس کی ایک  ٹیم نے  چیتے کی کھال بیچنے والے اس ٹولی  سے گاہک کے طور پر پہلے بات چیت کی، پھر انہیں شاستری سرکل کے قریب کا پتہ بتا کر رقم لے جانے  اور   چیتے کی کھال ساتھ لے کر  آنے کے لئے کہا،   جیسے ہی  یہ ٹولی  ہونڈا اور  ماروتی کار پر سوار ہوکر  متعلقہ مقام پر پہنچے اور چیتے کی کھال  اُن کے  ہاتھ میں تھمانے کی کوشش کی، پولس نے  اُسی وقت رنگے ہاتھوں اُنہیں گرفتار کرلیا۔

پولس ذرائع کے مطابق  ٹولے کے افراد نے پولس پر حملہ کرکے فرار ہونے کی بھی کوشش کی، مگر ٹیم نے اُن کے ہر حربوں کو ناکام بنادیا ۔ بتایا گیا ہے کہ جس چیتے کی کھال کو ضبط کیا گیا ہے، وہ ساڑھے چار سال کی  عمر کے چیتے کی ہے۔

گرفتار شدگان کی شناخت  بھٹکل کڈون کٹہ کے رگھو، بھٹکل ہاڈولی کے ناگراج  نائک، بینگرے کے پروین رام دیواڑیگا،  رنگین کٹہ کے موہن جی نائک  اور سونارکیری کے سدانند رائیکر ، منڈگوڈ کے سورج،  بیندور کے ناگراج، سنجیو پجاری، وریندر شٹی اور ہوناور ماگوڈ کے جوسون کی حیثیت سے کی گئی ہے۔

پولس نے دس ملزمین کی گرفتاری کے ساتھ ہی دو کاروں کو بھی اپنی تحویل میں لیا ہے۔ معاملے کو اب محکمہ جنگلات کے سپرد کیا گیا ہے اور سبھی ملزمین پر غیر ضمانتی دفعات کے تحت معاملات درج کئے گئے ہیں۔