انکولہ:10؍ستمبر(ایس اؤ نیوز) تعلقہ کے آلگیری میں تعمیر کئے جانے والے شہری ہوائی اڈہ کے لئے زمین حصولیابی کے پہلے مرحلے کے طورپر سروے کا کام شروع کیاگیا ہے۔ حصولیابی افسر اجیت ایم کی نگرانی میں افسران سروے میں جٹے ہوئے ہیں۔

بحریہ اڈے سے متصل علاقے بیلکیری ، بھاویکیری ، آلگیری ، کنڈو گدے ،بڈگیری ، ہوسبھاگ نامی مضافات میں سروے کیا جا رہا ہے۔بتایاگیا ہے کہ سروے ٹیم  ممکنہ حد تک گھروں کو بچانے کی کوشش کرے گی۔ فاریسٹ، باغبانی ، آب پاشی ، زرعی ، پولس اور کے ایس آئی آئی ڈی سی محکمہ جات کے افسران پر مشتمل سروے ٹیم کمٹہ اسسٹنٹ کمشنر اور زمین حصولیابی افسراجیت کی قیادت میں سروے کررہی ہے ،

موصولہ اطلاع کے مطابق عوام نے سروے کو منظوری دی ہے۔آلگیری ناگریک ومان نلدھان ورودھی ہوراٹ سمیتی نے ضلع ڈی سی کو  اپنی 16شرائط سے واقف کرانے کے بعد منعقدہ میٹنگ میں سروے کو منظوری دی ہے۔ سروے کے لئے پہنچے افسران سے ملاقات کرتےہوئے سمیتی کے ذمہ داروں نے زمین جائیداد کھونےو الوں کے ساتھ انسانیت کے ناطے بہتر رویہ اپنانے کی اپیل کی۔ اس موقع پر تحصیلدار اُدئیے کمبار، ڈی وائی ایس پی اروند کلگجی ، سی پی آئی کرشنا نند نایک، پی ایس آئی سنپت  سمیت مختلف محکمہ جات کے افسران موجود تھے۔