بھٹکل میں گھر گھر جاکر سروے کرتی خواتین کو آزاد نگر میں روک دیا گیا؛ اسسٹنٹ کمشنر نے کہا، سرکار کی طرف سے نہیں ہورہا ہے کوئی سروے
بھٹکل 23/جنوری (ایس او نیوز) بھٹکل میں گھر گھر جاکر سروے کرنے والی خواتین کو آزاد نگر کے عوام نے اُس وقت روک لیا جب تین خواتین پر مشتمل ایک ٹیم ایک مکان سے معلومات جمع کرنے کے بعد دوسرے مکان کے کمپاونڈ میں داخل ہورہی تھیں۔ مقامی لوگوں نے خواتین سے سوالات کئے تو اُن میں سے ایک خاتون نے اپنا شناختی کارڈ دکھاتے ہوئے بتایا کہ وہ بنگلور سے خصوصی سروے کے لئے آئی ہیں۔ فوری طور پر مقامی لوگوں نے قومی سماجی ادارہ مجلس اصلاح و تنظیم کے صدر جناب ایس ایم سید پرویز کو واقعے کی جانکاری دی جو اطلاع ملتے ہی جائے وقوع پر پہنچ گئے اور خواتین کو سروے کرنے سے روکتے ہوئے اُنہیں واپس بھیج دیا۔
اس تعلق سے ایک وڈیو سوشیل میڈیا پر وائرل ہوگیا جس میں ایس ایم سید پرویز صاحب خواتین سے سوالات کررہے ہیں اور سروے کرنے والی ٹیم کی ایک خاتون بتارہی ہے کہ اُس کا تعلق بنگلور سے ہے اور اُنہیں منسٹری آف ہوم آفائرس کی جانب سے گھر گھر جاکر سروے کرنے کی ذمہ داری سونپی گئی ہے۔
ساحل آن لائن سے گفتگو کرتے ہوئے جناب ایس ایم پرویز نے بتایا کہ فون پر خبر ملتے ہی وہ جائے وقوع پر پہنچ گئے تھے سوالات کرنے پر پتہ چلا کہ ایک خاتون بنگلور سے آئی تھی جبکہ دیگر دو کا تعلق بھٹکل سے ہے۔ اُن سے پوچھنے پرخواتین نے بتایا کہ سروے بنگلور منسٹری آف ہوم افائرس کی جانب سے دی گئی ہدایات پر کیا جارہا ہے، خواتین نے بتایا کہ اُنہیں ہدایت دی گئی ہے کہ وہ چند جگہوں پر جائیں اور سینسس کرکے اُس کا ایک سیمپل موڈل اُنہیں روانہ کریں۔ جناب ایس ایم پرویز نے اُنہیں یہ کہہ کر واپس جانے کے لئے کہا کہ اگر سرکار کی طرف سے کوئی سروے کرنا ہو تو مقامی محکمہ کے آفسران کی طرف سے اجازت نامہ کے ساتھ ساتھ متعلقہ محکمہ کے آفسران کو ساتھ لے کر سروے کریں۔ اس طرح کی بات چیت کے بعد تینوں خواتین کو واپس بھیج دیا گیا۔
بھٹکل اسسٹنٹ کمشنر ساجد مُلا سے سروے یا سینسس کے تعلق سے پوچھے جانے پر انہوں نے بتایا کہ سرکار کی طرف سے کوئی سروے نہیں ہورہا ہے اور محکمہ کی طرف سے سینسس یا کسی بھی طرح کے سروے کے لئے کسی کو بھی نہیں بھیجا گیا ہے۔ انہوں نے حیرت کا اظہار کیا کہ کون لوگ آخر گھر گھر پہنچ کر سروے کررہے ہیں۔ انہوں نے عوام الناس سے درخواست کی کہ اگر کسی علاقہ میں کسی بھی طرح کے سروے کے لئے کوئی پہنچتا ہے تو اُسی وقت محکمہ کو خبر کریں۔ انہوں نے بتایا کہ اس تعلق سے محکمہ کو کسی بھی شخص یا کسی بھی ادارہ کی طرف سے کوئی شکایت موصول نہیں ہوئی ہے۔
خبر ملی ہے کہ چند روز قبل مُنڈلی میں بھی تین مرد حضرات سروے کرنے پہنچے تھے اور اُس وقت بھی اُسی علاقہ کے عوام نے اُنہیں راستے میں ہی روک کر واپس بھیج دیا تھا، مُنڈلی میں سروے کرنے والوں میں بھی ایک کا تعلق بنگلور سے اور دیگر دو کا تعلق بھٹکل سے تھا۔
شہریت قانون ، این آر سی اور این پی آر کی مخالفت میں ملک بھر میں جہاں مظاہرے ہورہے ہیں، ایسے میں شبہ ظاہر کیا جارہا ہے کہ بی جے پی کی جانب سے الگ الگ ٹیمیں بناکر لوگوں کو الگ الگ مقامات پر بھیج کر سروے کرنے کی کوشش کی جارہی ہے۔ اس تعلق سے تنظیم کے صدر جناب ایس ایم سید پرویز نے واضح کیا ہے کہ اگر کسی گھر پر کوئی سروے کے لئے آتا ہو تو اُنہیں کسی بھی طرح کی معلومات نہ دیں اور مقامی ذمہ داران کو فوری واقعے کی خبر کریں۔ آزاد نگر میں آج ہوئی واردات کے بارے میں انہوں نے بتایا کہ وہ کل بھٹکل اسسٹنٹ کمشنر سے ملاقات کرکے واقعے کے تعلق سے شکایت درج کرائیں گے۔