بنگلورو:7؍فروری(ایس اؤ نیوز) شہریت ترمیمی قانون کے خلاف 18دسمبر 2019کو منگلورو میں ہوئے احتجاج کے دوران پولس کی گولی باری سے دو لوگ شہید  ہوئے تھے جس کے بعد  پولس کے خلاف کارروائی کا مطالبہ لے کر عمر سلیا اور اقبال ایلی ملے نے ہائی کورٹ میں مشترکہ پی آئی ایل (مفاد عامہ ) دائر  کی تھی۔ دوسر ی طرف مجاہد آزادی دورے سوامی اور منگلورو کے  سابق مئیر اشرف نے بھی مشترکہ پی آئی ایل داخل کی تھی۔

ذرائع سے ملی اطلاع کے مطابق دونوں پی آئی ایل کی سنوائی کرتےہوئے ہائی کورٹ نے عمر سلیاکی جانب سے در ج کی ہوئی عرضی کو رد کردیا۔مگر مجاہد آزادی دورے سوامی کی عرضی کو قبول کرتےہوئےمنگلورو پولس کمشنر ڈاکٹر ہرشا اور ان کی ٹیم کو سخت حکم جاری کیا ہے اور کہا ہے کہ  منگلورو واقعہ کے متعلقہ سی سی ٹی وی فوٹیج ،وڈیو ریکارڈنگ ، سوشیل میڈیا پر وائر ل وڈیو سمیت سب کچھ محفوظ رکھیں۔

مانا جارہاہے کہ ہائی کورٹ کے  حکم نے  پولس ٹیم کو کافی تشویش میں مبتلا کردیا ہے۔ عدالت میں سنوائی کے دوران منگلورو پولس کمشنر ڈاکٹر پی ایس ہرشا سمیت گولی بار کے متعلقہ پولس افسران موجود تھے۔