ریاستی حکومت کی جانب سے سرکاری ملازمین کے لئے جاری کی گئیں ہدایات : شوہر ، بیوی کے رہتے دوسری شادی نہیں ، جہیز نہیں، کتابوں کی اشاعت پر پابندی ، سیاسی سرگرمیوں میں شریک ہونے پر ممانعت
بھٹکل :9؍جنوری (ایس اؤ نیوز) ریاست کرناٹک کے وزارت شہری خدمات کی طرف سےجاری کئے گئے 2020قانون میں سرکاری ملازمین کے لئے ہدایات دی گئی ہیں کہ اب آئندہ سے سرکاری ملازمین فلم، سیرئیل میں ادا کاری نہیں کرسکتے، بغیر اجازت کے کوئی کتاب شائع نہیں کرسکتے، شوہر، بیوی کے رہتے ہوئے دوسری شادی نہیں رچا سکتےاسی طرح جہیز نہیں لے سکتے۔
وزارت کی طرف سے جاری کردہ قانون کے مطابق کوئی بھی سرکاری ملازم مستند ادارے سے اجازت لئے بغیر کسی بھی فلم یا دوردرشن کے سیرئیل میں اداکاری نہیں کرسکتا۔ حکومت نے سرکاری ملازمین کو فلموں اور سیرئیلس کے لئے اداکاری کرنے میں مصروف ہونے اور کتابوں کے شائع کرنےپر پابندی عائد کرتےہوئے کہا ہےکہ انہیں ریاستی اور مرکزی حکومت کی پالیسیوں پر تنقید کرنے کی بھی اجازت نہیں ہے۔ مذہبی، نسلی ، لسانی ، علاقائی ، فرقہ وارانہ جذبات اور نفرت کی وجہ سبب بننے والے اداروں ،تنظیموں وغیرہ میں شریک نہیں ہوسکتے۔ ملک کی سالمیت، یک جہتی ،حفاظت ، بیرونی ممالک سے تعلقات خراب کرنے کا مقصد لے کر ہونے والے احتجاجات ، عام اجلاسوں میں بھی وہ شامل نہیں ہوسکتے ۔ اسی طرح انہیں پیشگی اجازت کے بغیر کوئی ایوارڈ حاصل کرنے سے منع کیاگیا ہے۔ نابالغ بچوں کو گھر کے کاموں میں مشغول نہیں کرسکتے۔کوئی بھی ملازم بیرونی ممالک میں اپنے یا اپنے خاندان کے نام پر جائیداد یا ملکیت بھی ان نہیں خرید سکیں گے۔
سرکاری ملازمین کو عوامی جگہوں پر منشیات یا نشیلی اشیاء کے استعمال پر پابندی عائد کی گئی ہے۔وڈیو سریز سمیت ریڈیوٹیلی ویژن چینلس میں میڈیا پروگرامات منعقد کرنے پر بھی ممانعت عائد کی گئی ہے۔27اکتوبر 2020کو ڈی پی اے آر نے متعلقہ ڈرافٹ اصولوں پر اعتراضات کے لئے اعلان کیا تھا۔ یہ سبھی نئے اصول تمام سرکاری ملازمین پر نافذ ہونگے۔
سیاسی پارٹیوں کے اداروں میں بھی نہیں : سرکاری ملازمین کسی بھی سیاسی پارٹی یا سیاسی پارٹیوں سے منسلک کسی بھی ادارے یاتنظیم کے ممبر نہیں بن سکتے۔ ان کے ساتھ کسی قسم کا تعلق نہیں رکھ سکتے۔ سیاسی جدوجہد یا اس کی سرگرمیوں میں شریک نہیں ہوسکتے، ان کے لئے چندہ نہ وصول کرسکتے ہیں اور نہ دے سکتےہیں۔ قانونی حکومت کا تختہ الٹنے کے لئے کھلے عام یا خفیہ سرگرمیوں میں شریک نہیں ہوسکتے، سرکاری ملازمین کے خاندان والے بھی اس میں شریک نہیں ہوسکتے۔ سیاسی پارٹیوں کی حمایت میں انتخابی تشہیر میں حصہ نہیں لے سکتے۔ ریاستی یا قومی سطح کے کھیل اداروں کے انتخابات میں بھی حصہ لینے پر پابندی عائد کی گئی ہے۔