کاروار: ایس ایس ایل سی میں ناکام ہونے والوں کے لئے 21 جون سے ہوگا سپلیمنٹری امتحان
کاروار19/جون (ایس او نیوز) ایس ایس ایل سی میں ناکام ہونے والے طلبا و طالبات کے لئے مورخہ 21 جون سے 28 جون کے لئے سپلیمنٹری امتحانات منعقد کئے گئے ہیں اور متعینہ مدت میں امتحانی مراکز کے 200 میٹر تک کے دائرہ میں امتناعی احکامات دفعہ 144 جاری کئے گئے ہیں، اس بات کی اطلاع اُترکنڑا کے ڈپٹی کمشنر ڈاکٹر ہریش کمار نے دی ہے۔
ڈپٹی کمشنر نے پریس ریلیز جاری کرتے ہوئے بتایا کہ ضلع اُتر کنڑا میں جملہ 14 امتحانی مراکز قائم کئے گئے ہیں جس میں کاروار اور سرسی تعلیمی اضلاع شامل ہیں۔
اسی طرح کی ایک پریس ریلیز اُترکنڑا ڈی ڈی پی آئی کے منجوناتھ نے بھی جاری کی ہے جس میں انہوں نے بتایا ہے کہ کاروار تعلیمی ضلع میں پانچ تعلقہ جات ہیں جس میں 6 امتحانی مراکز قائم کئے گئے ہیں اور اس بار ان مراکز میں 1344 طلبا ایس ایس ایل سی کا دوبارہ امتحان لکھیں گے۔
ریلیز کے مطابق انکولہ میں پی ایم ہائی اسکول، بھٹکل میں اسلامیہ اینگلو اُردو ہائی اسکول، ہوناور میں نیو انگلش اسکول، کاروار میں ہندو ہائی اسکول اور سینٹ مائیکل ہائی اسکول، اسی طرح کمٹہ میں گیب ہائی اسکول میں امتحانی مراکز قائم کئے گئے ہیں۔
امتحانات صبح 9:30 بجے شروع ہوں گے اور 12.45 کو اختتام کو پہنچیں گے۔
جون 21 کو میتھس، 24 کو سائنس، 25 کو فرسٹ لانگویج (کنڑا، انگلش، سنسکرتی، مراٹھی، تیلگو، ہندی، تمل، اُردو)، 26 کو سماجی سائنس، 27 کو سکینڈ لانگویج (کنڑا، انگلش ) جبکہ 28 جون کو تھرڈ لانگویج کا امتحان ہوگا۔