بنگلورو،20؍ستمبر(ایس او نیوز) کرناٹک ہائی کور ٹ نے مرکزی حکومت سے کہا ہے کہ سوشیل میڈیا کے استعمال کیلئے کم از کم عمر کی حد مقرر کرنے کے بارے میں وہ غور کرے۔ جسٹس نریندر اور جسٹس وجئے کمار اے پاٹل پرمشتمل ایک بینچ نے ’ایکس‘ (سابقہ ’ٹوئٹر‘) کی2021ء اور2022کے دوران کئے گئے چند ٹوئیس سے متعلق ایک عرضی کی سماعت کے دوران یہ تبصرہ کیا۔ مرکزی حکومت کی طرف سے چند ٹوئٹر اکاؤنٹس کو بلاک کرنے کی ہدایت کے خلاف دائر عرضی کی سماعت کرتے ہوئے ہائی کورٹ نے یہ تبصرہ کیا-

اس سے قبل عدالت نے سوشیل میڈیا کمپنی کی اس عرضی کو مسترد کر دیا جس میں گزارش کی گئی تھی کہ مرکزی حکومت کے احکامات کی تعمیل نہ کئے جانے پر اس کے خلاف 50لاکھ روپے کا جو جرمانہ عائد کیا گیا ہے وہ منسوخ کیا جائے۔سماعت کے اختتام پر بینچ نے کہا کہ مرکزی حکومت کی طرف سے اگر سوشیل میڈیا کے استعمال کے لئے کم از کم عمر کی حد متعین کر دی جائے تو اس سے بہت فائدہ ہو سکتا ہے۔عدالت نے کہا کہ بہتر یہی ہو گا کہ مرکزی حکومت مجموعی طور پر شوشیل میڈیا پر پابندی عائد کر دے۔ اس سے بہت اچھا ہو جائے گا۔ آج کل اسکول جانے والے بچے سوشیل میڈیا کے اس قدر عادی ہو چکے ہیں کہ یکسائز قوانین کی مانند اس کے لئے بھی عمر کی کوئی حد متعین ہونی چاہئے۔