بھٹکل 6 / مارچ (ایس او نیوز)  سپریم کورٹ کالیجیم نے  ہائی کورٹ جج کے عہدے پر نامزدگی کے لئے بھٹکل سے تعلق رکھنے والے معروف ہائی کورٹ وکیل ناگیندرا نائک کے سفارش مرکزی حکومت سے کی ہے۔ اگر یہ سفارش منظور ہوتی ہے تو یہ ایڈوکیٹ ناگیندرا نائک ہائی کورٹ جج بننے والے بھٹکل کے پہلے شخص ہونگے۔

    خیال رہے کہ سپریم کورٹ کالجیم نے اس عہدے کے لئے ناگیندرا نائک کی سفارش دوسری مرتبہ کی ہے۔ اس سےقبل اکتوبر 2019 میں جن 8 وکلاء کے نام کی سفارش کی گئی تھی اس میں ایڈوکیٹ ناگیندرا نائک کا نام بھی شامل تھا، مگر اُس وقت مرکزی حکومت نے اسے منظور نہیں کیا تھا۔ مگر اب دوسری مرتبہ پیش ہونے کی وجہ سے یہ نام منظور کیے جانے کے قوی امکانات موجود ہیں۔  

    ناگیندرا نائک بھٹکل تعلقہ میں سرپن کٹہ علاقے کے رہنے والے ہیں۔ انہوں نے انجمن کالج میں گریجویشن کے بعد بنگلورو میں وکالت کی تعلیم مکمل کی ہے۔ گزشتہ 28 سال سے ہائی کورٹ میں وکالت کر رہے ہیں۔ سیکیولر ذہن اور ملنسار طبعیت کے مالک ایڈوکیٹ ناگیندرا نائک وکالت کے علاوہ باغبانی اور کھیتی باڑی میں دلچسپی رکھتے ہیں۔ خوبصورت اور نمائشی پھولوں کی باغبانی کے لئے انہیں ایوارڈ سے بھی نوازا گیا ہے۔ اگر ناگیندرا نائک ہائی کورٹ جج کے عہدے پر فائز ہوتے ہیں تو یہ صرف بھٹکل کے لئے نہیں بلکہ پورے ضلع شمالی کینرا میں موجود ان کے چاہنے والوں کے لئے ایک قابل رشک بات ہوگی۔