بھٹکل مسلم یوتھ فیڈریشن کا دوسرا واٹر پلانٹ؛ مخدوم کالونی بندر روڈ پر رکھا گیا سنگ بنیاد
بھٹکل31/اگست (ایس او نیوز) شہر کے مخدوم کالونی، بندر روڈ پر آج سنیچر کو بھٹکل مسلم یوتھ فیڈریشن کی جانب سے واٹر پلانٹ کی تعمیر کا سنگ بنیاد رکھا گیا۔ اس موقع پر گفتگو کرتے ہوئے بھٹکل مسلم یوتھ فیڈریشن کے صدر امتیاز اُدیاور نے بتایا کہ یہ پلانٹ بھٹکل مسلم جماعت دبئی کے تعاون سے تعمیر کیا جارہا ہے جبکہ واٹر ٹینک تعمیر کرنے جگہ کا انتظام بھٹکل میونسپالٹی نے کیا ہے۔
انہوں نے بتایا کہ 10ہزار لیٹر واٹر ٹینک کی تعمیر کے ساتھ ہی ایک طرف مخدوم کالونی کے عوام کو فائدہ پہنچے گا، تو دوسری طرف بندر جانے والوں اور ہنومان نگر جانے والوں کو بھی پانی لے جانے کی سہولت ہوگی، اسی طرح قریبی علاقوں کریکال، بیلنی، ڈونگر پلی، اے پی جے عبدالکلام روڈ، آسارکیری وغیرہ علاقوں کے لوگوں کو بھی فائدہ پہنچے گا۔ امتیاز اُدیاور نے بتایا کہ شہر میں جب پانی کی قلت پائی جارہی تھی تو فیڈریشن کی طرف سے بھٹکل کے تقریبا ہر علاقہ میں بغیر کسی مذہبی تفریق کئے پانی سپلائی کیا گیا تھا جس کے لئے فیڈریشن نے جن جن جماعتوں اور اداروں سے تعاون مانگا، ہر ایک نے تعاون فراہم کیا، یہاں تک کہ کئی لوگ انفرادی طور پر بھی تعاون پیش کرنے کے لئے آگے آئے ۔ اسی طرح شہر کے مختلف علاقوں میں اب فیڈریشن کی جانب سے صاف و شفاف پینے کے پانی کا پلانٹ تعمیر کرنے کا منصوبہ بنایا گیا ہے اور توقع ہے کہ آگے بھی تمام جماعتوں اور اداروں کی جانب سے تعاون ملے گا۔
فیڈریشن کے جنرل سکریٹری محمد نصیف خلیفہ نے بتایا کہ فیڈریشن کی طرف سے آئندہ مدینہ کالونی، پھول بازار اور جالی روڈ میں بھی اسی طرز کا پلانٹ تعمیر کرنے کا منصوبہ ہے، ساتھ ساتھ اطراف کے علاقوں بالخصوص مرڈیشور، منکی وغیرہ علاقوں میں بھی اگر پانی کی قلت پائی جاتی ہو اور وہاں کے ذمہ داران جگہ فراہم کرنے کے لئے تیار ہوں تو فیڈریشن اُن علاقوں میں بھی واٹرپلانٹ تعمیر کرسکتی ہے۔
واضح رہے کہ گذشتہ ماہ فیڈریشن کی طرف سے پہلا واٹر پلانٹ غوثیہ اسٹریٹ میں مکمل کیا گیا تھا، جہاں سے غوثیہ اسٹریٹ، قاضیا اسٹریٹ، مشما اسٹریٹ و دیگر مسلم محلوں سمیت منڈلی، کرسچن کیری، نستار وغیرہ کے علاقوں کے لوگوں کو بھی فائدہ ہورہا ہے۔ غوثیہ اسٹریٹ میں واٹر پلانٹ کے لئے بھٹکل مسلم جماعت منطقۃ الشرقیہ نے تعاون فراہم کیا تھا۔
مخدوم کالونی میں واٹر ٹینک کی تعمیر کا سنگ بنیاد رکھنے کے موقع پر بھٹکل مسلم خلیج کونسل کے جنرل سکریٹری جناب محمد یونس قاضیا، جامعہ اسلامیہ کے پرنسپال مولانا مقبول کوبٹے ندوی، مخدوم کالونی جمعہ مسجد کے خطیب مولانا نعت اللہ عسکری ندوی، بھٹکل مسلم یوتھ فیڈریشن کے سابق صدر مولانا انصار خطیب مدنی، مجلس اصلاح و تنظیم کے نائب صدر اور بھٹکل مسلم جماعت دبئی کے سرگرم رکن جناب عتیق الرحمن مُنیری، دبئی جماعت کے سابق جنرل سکریٹری جناب جیلانی محتشم، دیگر اراکین جناب شہریار خطیب، جناب قاضیا ابراہیم، مولوی ارشاد افریقہ ندوی سمیت شاہین اسپورٹس سینٹر کے صدر سمیع اللہ اِٹل، جنرل سکریٹری مبشر حُسین ہلارے، بھٹکل میونسپل کونسل کے سابق صدر اور سماجی کارکن محمد صادق مٹا و دیگر کافی ذمہ داران موجود تھے۔
بھٹکل مسلم یوتھ فیڈریشن کی جانب سے بھٹکل میں پانی کی شدید قلت کے موقع پرگھر گھر پانی سپلائی کرکے ہندو مسلم بھائی چارگی کو فروغ دینے اور شہر میں امن و بھائی چارگی کی فضا کو بحال رکھنے کی کوششوں پر مختلف اداروں کے ذمہ داروں نے اپنے اپنے تاثرات میں نہایت خوشی کا اظہار کیا اور نوجوانوں کو اسی طرح آگے بڑھ کر قومی و ملی کاموں میں دلچسپی لینے کی ترغیب دی۔