افغانستان بحران: وزیر خارجہ جے شنکر نے درمیان میں چھوڑا غیر ملکی دورہ ، میکسیکو، پناما اور گیانا جانا تھا
کابل، 21؍ اگست (ایس او نیوز؍ایجنسی) افغانستان میں طالبان کے قبضے کے بعد وہاں پھنسے ہوئے ہندوستانیوں کو واپس لانے کی کوششیں جاری ہیں۔ دریں اثناوزیر خارجہ ڈاکٹر ایس جے شنکر اپنا غیر ملکی دورہ درمیان میں چھوڑ چکے ہیں اور وہ آج ہندوستان واپس آگئے۔ ذرائع کے مطابق وزیر خارجہ جے شنکر کو نیویارک کے بعد لاطینی امریکی ممالک میکسیکو، پناما اور گیانا کا دورہ کرنا تھا۔ذرائع کے مطابق اقوام متحدہ کی سلامتی کونسل میں ہندوستان کی صدارت سے متعلق تمام پروگراموں میں شرکت کے بعد وزیر خارجہ کو تین لاطینی امریکی ممالک کا دورہ کرنا تھا تاہم اب وہ ان ممالک کے دورے منسوخ کرنے کے بعد براہ راست ہندوستان واپس آگئے۔
ذرائع نے بتایا کہ وزیر خارجہ یہ کام افغانستان سے ہندوستانی شہریوں کو بحفاظت نکالنے کی کوششوں کے پیش نظر کر رہے ہیں۔ ذرائع نے بتایا کہ کئی ہندوستانی اب بھی کابل میں پھنسے ہوئے ہیں، ایسی صورت حال میں انھیں محفوظ رکھنے کے لیے امریکہ سمیت قریبی ممالک کے ساتھ مسلسل بات چیت اور ہم آہنگی کی ضرورت ہے۔ یہی بنیادی وجہ ہے کہ وزیر خارجہ آج ہی ملک واپس آگئے۔