ممبئی،2؍ جولائی(ایس او نیوز؍ایجنسی)واشنگٹن کے نیشنل پریس کلب کی صدر جین جوڈسن اور امریکہ نیشنل پریس کلب جرنلزم انسٹی ٹیوٹ کے صدر گل کلین نے ہندوستان کی صحافی رعنا ایوب کو 2022کے بین الاقوامی جان ایوبچن ایوارڈ کیلئے نامزد کیا ہے۔ ایوبچن ایوارڈ امریکہ میں پریس فریڈم کا سب سے بڑا اعزاز مانا جاتا ہے۔ اگرچہ ایوبچن ایوارڈ کا اعلان سال کے آخر تک باضابطہ طور پر نہیں کیا جائے گا لیکن کلب نے رعنا کے معاملے کی طرف توجہ مبذول کرنے اور ان کی حمایت کرنے اور دوسروں کی حوصلہ افزائی کیلئے اس کا اعلان کیا ہے۔

رعنا ایوب پہلی ہندوستانی صحافی ہیں جنہوں نے جان ایوبچن ایوارڈ حاصل کیا۔ وہیں رعنا نے پریس کلب کا شکریہ ادا کرتے ہوئے اپنے اعزاز کو کشمیری صحافی آصف سلطان، محمد زبیر صدیق کپن اور دیگر سچ بولنے والوں صحافیوں کے نام وقف کیا۔ان کا کہنا تھا کہ یہ ہندوستان میں صحافت کیلئے آزمائش کا وقت ہے۔ یہ ایوارڈ میرے لیے بہت بڑا اعزاز ہے، کسی ہندوستان کیلئے یہ پہلا اعزاز ہے۔ اسے اپنے ساتھیوں محمد زبیر، صدیق کپن اور آصف سلطان، جو سچ بولنے پر جیل میں ہیں، کے نام وقف کر رہی ہوں۔ جین جوڈسن نے اپنے بیان میں کہا کہ ہمیں رعنا ایوب کو 2022جان ایوبچن ایوارڈ انٹرنیشنل ایوارڈ کیلئے نامزد کرتے ہوئے خوشی ہو رہی ہے۔ تحقیقاتی کام میں رعنا کی ہمت اور مہارت ان کے پورے کیرئیر میں نمایاں رہی ہے۔

حکومت پر ان کی جانب سے تنقید کی وجہ سے رانا کو کئی حملوں کا سامنا کرنا پڑا ہے۔ بیان میں کہا گیا ہے کہ ہمیں تشویش ہے کہ گزشتہ ہفتے کے آخر میں ٹویٹر نے رعنا کو مطلع کیا کہ انفارمیشن ٹیکنالوجی ایکٹ کے تحت ہندوستان میں ان کا اکاؤنٹ روک دیا ہے۔ ہم ٹویٹر پر زور دیتے ہیں کہ وہ رعنا کا اکاؤنٹ فوری طور پر بحال کرے۔ بیان میں رعنا پر سلسلہ وار ہو رہی زیادتیوں کا بھی ذکر کیا گیا ہے۔ بیان میں کہا گیا ہے کہ ہم اس بات سے بھی واقف ہیں کہ ہندوستانی حکومت نے رعنا کی ذاتی مالی معلومات کیلئے کئی طرح کی کارروائی کی ہے اور ہم سمجھتے ہیں کہ وہ آن لائن اور ذاتی طور پر دونوں طرح کی دھمکیوں کی شکار رہی ہے جس کی وجہ سے ان کو چھپنا پڑا۔ بیان کے مطابق مارچ کے مہینے میں رانا کو لندن جانے سے روک دیا گیا تھا حالانکہ ایسا لگتا ہے کہ اس کے وکلا تب سے ہندوستانی حکومت کی طرف سے ان سفری پابندیوں کو ہٹانے میں کامیاب ہو گئے ہیں۔ اس سے قبل فروری میں سرکار نے رعنا کے زیادہ تر اثاثے مشکوک الزامات پر فریز کیے۔