بھٹکل، کمٹہ، کنداپور، اُڈپی مینگلور میں کل سے ہوگا پہلا روزہ؛ رات سے تراویح شروع
بھٹکل 23/اپریل (ایس او نیوز) بھٹکل کے قاضی صاحبان نے اعلان کیا ہے کہ رمضان کا چاند نظر آچکا ہے لہٰذا کل جمعہ سے پہلا روزہ اور آج رات سے تراویح کا آغاز ہوگا۔ چونکہ ملک بھر میں کوویڈ۔۱۹ وباء کو لے کر لاک ڈاون چل رہا ہے اور پانچ وقتوں کی نماز سمیت جمعہ کی نماز بھی مساجد میں بند ہے، اس لئے تراویح بھی گھروں میں ہی ادا کرنے کی ہدایت دی گئی ہے۔
بھٹکل جماعت المسلمین کے قاضی مولانا محمد اقبال مُلا ندوی اور مرکزی خلیفہ جماعت المسلمین کے قاضی مولانا خواجہ معین الدین اکرمی مدنی نے اپنے مشترکہ اعلان میں کہا کہ پڑوسی ریاست کیرالہ کے کالیکٹ کے کاپاڈ میں چاند نظر آنے کی تصدیق ہوئی ہے جس کی بنیاد پر رمضان کا اعلان کیا جارہا ہے۔ انہوں نے تمام مسلمانوں کو ہدایت دی کہ وہ اپنے گھروں میں ہی دیگر نمازوں کی طرح تراویح بھی ادا کریں۔
بھٹکل میں رمضان کا اعلان کئے جانے کے فوری بعد کمٹہ جماعت المسلمین نے بھی کمٹہ میں کل سے رمضان کا اعلان کیا ہے، جبکہ پڑوسی علاقہ شیرور، بیندور، کنداپور، گنگولی، اُڈپی ، مینگلور کے ساتھ ساتھ پڑوسی ریاست کیرالہ میں بھی رمضان کا اعلان کیا جاچکا ہے۔ تمام علاقوں میں متعلقہ قاضی صاحبان نے مسلمانوں کو گھروں میں ہی تراویح پڑھنے کی ہدایت جاری ہے۔
