بھٹکل مجلس احیاء المدارس کے زیراہتمام انوکھی نوعیت کا ’اجتماعی قرأت مقابلے ‘کا خوبصورت انعقاد : قرآن فیصلہ کن ، ممتاز ،مسلسل پڑھی جانی والی واحد کتاب ہے
بھٹکل:21؍فروری (ایس او نیوز)مجلس احیاء المدارس بھٹکل کے زیر اہتمام مخدوم کالونی میں واقع مدرسہ دارالتعلیم و التربیہ میں 19فروری 2018بروز منگل کی رات منعقدہ اپنی نوعیت کے پہلے ’’اجتماعی قرأت مقابلہ ‘‘میں جامعہ اسلامیہ چوک بازار بھٹکل اول، جامعہ اسلامیہ بھٹکل کے شعبہ ثانویہ دوم اور جامعہ اسلامیہ کارگدے نے سوم انعام حاصل کیا ہے۔
دارالتعلیم و التربیہ مدرسہ کے صحن میں سجی پرنور محفل میں مختلف مدارس کے طلبا نے اپنی بساط بھر بہترین ،خوش الحان انداز میں قرآن مجید کی اجتماعی قرأت کی۔ ہر ایک سامعی محظوظ ہوتا دیکھا گیا۔ اور واقعی میں اپنی نوعیت کا یہ پہلا مقابلہ تھا جس میں کل 13ٹیموں نے اجتماعی قرأت کا دلکش طریقے پر مظاہرہ کیا۔ مقابلے میں مساہمین طلبا کونہ صرف اپنے درمیان یکسانیت کو باقی رکھنا تھا بلکہ اس کے ساتھ ساتھ تجوید و مخرج کو اجتماعی طورپر صحیح صحیح ادا کرنا تھا، الحمدللہ !جس حد تک ہماری نئی نسل کے پودوں نے سعی کی ہے وہ ایک خوش آئندہ پہلو ہے۔انوکھے مقابلے کے انعقاد پر حاضرین و سامعین نے منتظمین کی ستائش بھی کی۔
مقابلے میں گجرات سے تشریف فرما مشہور قاری عبدالحق صاحب فاروقی اورمحمد صاحب گجراتی نے قرآن قرأت کا بہترین عملی مظاہرہ پیش کرتے ہوئے طلبا کے لئے تربیت کا سامان بہم پہنچایا۔ ان کے ساتھ مخدوم کالونی جامعہ مسجد کے امام و خطیب مولانا نعمت اللہ عسکری ندوی نے ممتحن کے فرائض انجام دئیے ۔
جلسے میں جامعہ اسلامیہ بھٹکل کے مہتمم مولانا مقبول کوبٹے ندوی نے قرآن کی اہمیت، فضیلت اور افادیت پر روشنی ڈالتے ہوئے کہاکہ قرآن ہی دنیا کی واحد کتاب ہے جو مسلسل پڑھی جاتی رہتی ہے،اس کا تذکرہ ، چرچا جاری وساری ہے۔ مولانا نے کہاکہ قرآن کا ایک دوسرانا م فرقان بھی ہے، یعنی قرآن ایک فیصلہ کن اور ممتاز کتاب ہے ، حق و باطل میں فرق کرنے والی ، صحیح زندگی کے طریقے کو بتانے والی کتاب ہے۔ انہوں نے طلبا ، بچوں ، بڑوں سبھی عمر والوں سے کہاکہ علم حاصل کرنے کے لئے کوئی حد بندی اور وقت کی تعین نہیں ہے ، فکر ہوتو ہر ایک ہر عمر میں قرآن سیکھ سکتے ہیں، جب کہ بھٹکل میں اس کی بے شمار سہولیات میسر ہیں بس ارادے اور فکر کی ضرورت ہے۔قرآن باعثِ خیر،ہدایت کا ذریعہ ، روحانی علاج ہے۔ احکامات پر غورو تدبر کرتےہیں تو باطن پاکیزہ ہوتاہے۔
مقابلے کا آغاز اسماعیل سعداکی تلاوت قرآن سے ہوا۔حافظ ذوالقرنین انڈلے نے ہدیہ نعت پیش کی۔بھٹکل جماعت المسلمین کے چیف قاضی مولانا محمد اقبال ندوی نے صدارت کی ۔ مولوی اشفاق سدی باپا نے استقبال کیاتو دارلتعلیم و التربیہ کے مہتمم مولانا شجاع الدین ندوی نے رپورٹ کی خواندگی کی۔ محمد اذہان سدی باپا اور مولانا شکیب ندوی نے نظامت کے فرائض انجام دئیے۔احیاء المدارس کے جنرل سکریٹری مولانا محمد انصار ندوی مدنی نے شکریہ اداکیا۔ ڈائس پر مرکزی خلیفہ جماعت المسلمین کے چیف قاضی مولانا خواجہ معین الدین اکرمی ندوی مدنی ، مولانا محمد الیاس ندوی جاکٹی ،مولانا طلحہ رکن الدین ندوی ، مولانا شعیب جوکاکو ندوی ، مولانا عبدالعلیم قاسمی ، مولانا عبدالرب ندوی ، بلدیہ صدر محمد صادق مٹا، سمیع اللہ اٹل، عبدالرحیم وغیرہ موجود تھے۔ کثیر تعداد میں عوام شریک تھے اور تواضع کا خاص اہتمام تھا۔