اپن انگڈی کے قریب ٹینکرسے گیس کا اخراج۔علاقے میں پھیلا خوف وہراس۔ ماہرین نے بڑی مشقت سے پایا حالات پر قابو
پتور4/نومبر (ایس او نیوز)آج صبح تقریباً 8بجے کے وقت اپن انگڈی کے قریب کارویل میں منگلورو سے ہاسن کی گیس لے جانے والے بلیٹ ٹینکر کا اوپری والو اچانک کھل جانے سے بڑی پیمانے پر گیس کا اخراج شروع کیا۔ اس کی وجہ سے پورے علاقے میں خوف وہراس کاماحول پید ا ہوگیا۔
موصولہ رپورٹ کے مطابق یہ ٹینکر’ٹوٹل گیاز‘کمپنی کی ملکیت تھاجس کی ٹینک کا اوپری حصے میں موجود والو خودبخود کھل گیا اور بڑی تیزی سے گیس کا اخرج ہونے لگا۔ خطرے کوبھانپتے ہوئے مقامی مسجد کے لاؤڈ اسپیکر سے اعلان کرتے ہوئے علاقے کے عوام کو چوکنا کردیا گیا اورکسی بھی کسی چنگاری یا آگ جلانے سے باز رہنے کی ہدایت کی گئی۔ ساتھ ہی ساتھ گیس کے اخراج والا ٹینکر جہاں روکا گیا تھا وہاں کے قریبی علاقے سے لوگوں کو فوری طور پر دوسرے مقام کی طرف منتقل کردیا گیا۔
واقعے کی اطلاع ملتے ہی اپن انگڈی پولیس اور گیس کمپنی کے ماہرین موقع پر پہنچ گئے اور تقریباً ڈیڑ ھ گھنٹے کی مشقت کے بعد گیس کا والو درست کرتے ہوئے اخراج پر قابو پالیا گیا۔ تعجب خیز بات یہ ہے ٹینکر سے گیس کااخراج شروع ہوتے ہی مقامی لوگوں کو فون کے ذریعے فائر بریگیڈ عملے کو خبر کردی تھی، لیکن جائے وقوع سے صرف 12کلو میٹر دور واقع فائر بریگیڈ اسٹیشن سے عملے کو پہنچنے کے لئے تقریباڈیڑھ گھنٹے کا وقت لگ گیا۔ اور جب تک فائر بریگیڈ کی گاڑیاں پہنچتیں تب تک کمپنی کے ماہرین نے گیس کے اخراج پر قابو پالیا تھا اور حالات معمول پر آچکے تھے۔عوام نے فائر بریگیڈ کے اس غیر ذمہ دارانہ رویے پر اپنی برہمی کا اظہار کیا۔