منگلورو،4؍جون(ایس او نیوز) رکن اسمبلی یوٹی قادر نے ضلع انتظامیہ سے غریبوں کے لیے وینلاک اسپتال کو فوری کھولنے اور اس کی او پی ڈی خدمات کو بحال کرنے کا مطالبہ کیا ہے۔واضح رہے کہ ضلع کے وینلاک اسپتال کو کووڈ۔19 کا خصوصی اسپتال قرار دیا گیا ہے۔
اخبار نویسوں سے بات چیت کرتے ہوئے قادر نے کہا کہ وینلاک اسپتال کے کووڈ دواخانے میں تبدیل ہونے کے بعد غریب مریضوں کو مجبورا خانگی دوا خانوں کا رُخ کرنا پڑرہا ہے۔ وہ علاج کے لیے بھاری رقم ادا کرنے کے موقف میں نہیں ہیں۔ لہٰذا وینلاک اسپتال کو غریب مریضوں کے لیے فوری کھول دیا جانا چاہیے۔ کووڈ۔19 کی وباء پھوٹ پڑنے کے بعد بنگلورو کے سرکاری دواخانے کو کووڈ وارڈ میں تبدیل کرنے کی اطلاع دیتے ہوئے قادر نے کہا کہ بنگلورو میں 10 سے زائد سرکاری دواخانے ہیں مگر منگلورو میں ہمارے پاس ایک ہی ضلع سرکاری دواخانہ ہے۔ چونکہ یہ دواخانہ 8 اضلاع کے عوام کا علاج کرتا رہا ہے، تمام احتیاطی اقدامات اور ضروری انتظامات کے ساتھ اسے عوام کے لیے فوری کھول دیا جانا چاہئے۔
دریں اثناء قادر نے پولیس محکمہ سے ان شرپسندوں کو فوری گرفتار کرنےکا مطالبہ کیا جنہوں نے پمپ ویل کو ویر ساورکر سے موسوم کرنےکا بینر لگایا تھا ۔ انہوں نے کہا کہ پل لوگوں کو جوڑتے ہیں اور پل کا نام بھی ایسا ہی ہونا چاہئے۔ یہ عوام کو متحد کرنا چاہئے۔ چونکہ شرپسندوں نے اس طرح کا بینر لگا کرعوام کو تقسیم کرنے کی کوشش کی، اسے لگانے والوں اور طبع کرنے والوں کو گرفتار کرنا چاہئے۔