بھٹکل نیشنل ہائی وے پر ماروتی اومنی نے پیچھے سے لاری کو دی ٹکر؛ ڈرائیور زخمی
بھٹکل 14/جون (ایس او نیوز) یہاں سرپن کٹہ نیشنل ہائی وے پر ایک تیز رفتار ماروتی اومنی سڑک کنارے پارک کی ہوئی ایک لاری سے ٹکرانے کے نتیجے میں اومنی ڈرائیور زخمی ہوگیا جسے بھٹکل سرکاری اسپتال لے جایا گیا ہے۔
حادثہ ابھی اتوار رات قریب گیارہ بجے پیش آیا جب بیندور سے ماروتی اومنی پر سوار سنتوش دیواڑیگا (27) بھٹکل ریلوے اسٹیشن جارہا تھا جہاں اس کا ایک رشتہ رات 11:45 بجے کی منگلا ایکسپریس ٹرین پر آنے والا تھا۔ اس دوران سرپن کٹہ ہائی وے پر ایک ٹرک سڑک کنارے پارک کی گئی تھی اور ٹرک ڈرائیور قریبی ہوٹل سے ناشتہ پارسل کرکے لانے کے لئے اُترا تھا کہ اس کی اومنی پیچھے سے ٹرک کے اندر گھس گئی۔
حادثے میں سنتوش کے ہاتھ کو چوٹ لگی ہے، البتہ وہ بال بال بچ گیا ہے۔ اُسے بھٹکل سرکاری اسپتال میں ایڈمٹ کیا گیا ہے۔ حادثے میں ماروتی اومنی کو شدید نقصان پہنچا ہے۔
خیال رہے کہ چند روز قبل ہی دہلی اور مہاراشٹرا وغیرہ سے ٹرین سروس شروع ہوئی ہے جس کے بعد اُڈپی میں کورونا کے بڑھتے معاملات کو دیکھتے ہوئے اُڈپی ضلعی انتظامیہ نے ریلوے کو حکم دیا ہے کہ کوئی بھی ٹرین بیندوریا کنداپور وغیرہ اسٹیشنوں پر نہ رکنے پائے۔ اس لئے تمام ٹرین صرف اُڈپی میں ہی رُک رہی ہے، جہاں مسافروں کی سختی کے ساتھ جانچ کی جاتی ہے اور کورونا کی علامات پائی جانے کی صورت میں انہیں اُڈپی سرکاری اسپتال لے جایا جاتا ہے۔ بیندور اور کنداپور وغیرہ میں ٹرین کا اسٹاپ نہ ہونے سے پریشان اکثر لوگ بھٹکل اسٹیشن پر ہی اُتررہے ہی اور اپنے گھروں سے سواریوں کو منگوا کر اپنی سواریوں کے ذریعے گھر جارہے ہیں۔ایسے میں اب بھٹکل ریلوے اسٹیشن میں بھی اُترنے والے مسافروں کی سختی کے ساتھ جانچ کی جارہی ہے۔