نئی دہلی،12؍جولائی(ایس او نیوز؍ایجنسی) امریکہ کے سابق قومی سلامتی مشیر (این ایس اے) جان بولٹن نے ہند۔چین تنازع کے حوالے سے ایک بڑا بیان دیا ہے۔

انہوں نے کہا کہ اگر ہندوستان اور چین کے مابین کشیدگی مزید بڑھ جاتی ہے تو اس بات کی کوئی ضمانت نہیں ہے کہ صدر ڈونالڈ ٹرمپ ہندوستان کی حمایت کریں گے۔ انہوں نے کہا کہ مجھے نہیں معلوم کہ ایسی صورتحال میں ٹرمپ کیا کریں گے،لیکن یہ حقیقت ہے کہ وہ اس کے بارے میں زیادہ جانتے بھی نہیں ہیں۔

بولٹن نے ایک ٹی وی انٹرویو میں کہا کہ میں نہیں جانتا کہ ٹرمپ سرحدی تنازعہ کی اہمیت کو کتنا سمجھتے ہیں۔ مجھے نہیں لگتا کہ انہیں تنازع کی تاریخ کے بارے میں کچھ پتہ بھی ہے جو کئی دہائیوں سے ہندوستان۔ چین میں چل رہاہے۔بولٹن نے کہا کہ مجھے نہیں معلوم کہ نومبر کے انتخابات کے بعد ٹرمپ کیا کریں گے۔

انہوں نے قیاس آرائی کی کہ اگر ٹرمپ الیکشن جیت جاتے ہیں تو وہ ہانگ کانگ اور ایغور مسلمانوں پرہورہے مظالم پر چین کے خلاف نہیں جائیں گے۔کیوں کہ ٹرمپ،چین کے ساتھ بڑے تجارتی معاہدے کی فکر کررہے ہیں۔ ایسی صورتحال میں، اگر ہند۔ چین میں تنازع بڑھتا ہے تو مجھے یقین نہیں ہے کہ ٹرمپ، ہندوستان کے ساتھ کھڑے ہوں گے۔