بھٹکل:یکم جولائی (ایس اؤ نیوز)ضلع کاسیاسی ، سماجی و فلاحی ادارہ مجلس اصلاح وتنظیم بھٹکل کی جانب سے بھٹکل میونسپالٹی کے نومنتخب ممبران کے لئے تنظیم ہال میں تنظیم کے نائب صدر محتشم محمد جعفر کی صدارت میں  تہنیتی اجلاس کا انعقاد کیاگیا۔

اس موقع پر تنظیم کے جنرل سکریٹری مولوی ایم جے عبدالرقیب نے ملک کے موجودہ حالات کے پیش نظر متحد ہوکر عوامی خدمات کو انجام دینے کی بات کہی اور کسی بھی مسئلہ پر اختلاف ہونے پر اس کو بہتر انداز میں نبھاتے ہوئے آگے بڑھنے کانومنتخب کونسلروں کو مشورہ دیا۔ تنظیم کے نائب صدر عتیق الرحمان منیری نے نومنتخب کونسلروں سے خطاب کرتے ہوئے کہاکہ ہمارے کونسلرس کا اولین فرض ہے کہ وہ اس عوامی خدمت کے لئے آگے بڑھیں بغیر کسی صلہ و تمنا کے کام کریں ، اللہ تعالیٰ اس کا صلہ دے گا۔ انہوں نے کام کے دوران پیش آنے والے حالات کے متعلق کہاکہ  نومنتخب ممبران دل سے کام کریں، رکاوٹیں ، دقتیں آئیں گی ، فقرے کسے جائیں گے ، طعنہ دیاجائے گا مگر ایسے تمام موقعوں پرہم صبر سے کام لیں، زبان کو خاموش نہیں بلکہ محبت بھری چاشنی رکھیں ، سب کو ساتھ لے کر چلیں چاہے وہ کسی بھی مذہب وطبقہ کا کیوں نہ ہو،ان کا  اعتماد حاصل کریں گے تو ان شاء اللہ ہم ضرور کامیاب ہونگے ،خلوص نیت سے جو بھی کام کریں گے عند اللہ قبول ہونگے۔  اس معاملے میں تنظیم ،بھٹکل کے عوام ممبران کےساتھ ہونے کا تیقن دیا۔ بلدیہ کے سابق صدر عنایت اللہ شاہ بندری نے بھی کونسلروں سے حکمت اورصبر سے کام کرنے اور مسائل پر توجہ دینے کی تلقین کی۔ہرایک کونسلر اپنے علاقے میں کیا کچھ کام ہواہے کتنا باقی ہے کونسا کام ضروری ہے اس سلسلے میں ایک ایکشن پلان تیار رکھیں جب بھی حکومت سے کوئی اسکیم یا منصوبہ منظورہوتاہےتو اس کے تحت اپنا کام کروائیں۔ 

جامعہ اسلامیہ بھٹکل کے ناظم محمد شفیع شاہ بندری پٹیل نے مختصر خطاب کرتے ہوئے کہاکہ  ہم سے اللہ جو بھی بڑا ہو یا چھوٹا کام لے گا اور ہم بھی بحیثیت بلدیہ ممبر آگے بڑھ کر کام کریں۔ سرکاری افسران سے ہم کام لیں  ، وہ عوام  کے کاموں کے لئے تقرر کئے گئے ہیں،ہر کام کےلئے ممبران پر انحصار نہ کریں۔ اپنے اسلاف کے عمل کو اپنانے کی با ت کہی۔ تنظیم کے سیاسی پینل کے کنونیر اور نومنتخب ممبر محی الدین الطاف کھروری نے اپنے تاثرات پیش کرتے ہوئے کہاکہ بلدیہ کونسلراپنی ذمہ داری کو ادا کریں۔ اقلیتوں ،دبے کچلے طبقات کو سہولیات فراہم کریں، کونسلر افسران کے ساتھ  نرمی اور محبت سے اپنا کام لیں، ساتھ ہی قانونی رہنمائی کریں۔ بلدیہ کے سابق صدر اور نومنتخب ممبر پرویز قاسمجی نے اپنے تجربات کی روشنی میں کہاکہ  دیگر مقامات پر میونسپالٹی کے ممبران بڑی محنت ومشقت اور کافی تگ و دو کے بعدمنتخب ہوتے ہیں مگر بھٹکل میں  ایسا کوئی جھمیلہ نہیں ہوتابلکہ آسانی کے ساتھ تھوڑی سی محنت سے منتخب ہوجاتے ہیں اس کے لئے واحد وجہ ہماری تنظیم ہے جس کے نظام سے یہ سب کچھ ہوتاہے اور اس موقع پر انہوں نے پانچوں اداروں کے ذمہ داروں کی موجودگی میں تنظیم کی جانب سے تہنیتی اجلاس منعقد کئے جانے پر تنظیم کے عہدیداران کو مبارکبادی دیتے ہوئے شکریہ اداکیا۔ انہوں نے کہاکہ کونسلروں کے لئے ضروری ہے کہ اگر   افسران سے کام لینا ہے اور انہیں ان کی حد میں رکھنا ہے تو ان کی کمزوریوں پر نظر رکھیں  تو پھر اس کے بعد ہم اپنا کام آسانی سے کرسکتے ہیں اور کروابھی سکتے ہیں۔ اس موقع پر انجمن حامئی مسلمین بھٹکل کے صدر عبدالرحیم جوکاکو، جماعت المسلمین بھٹکل کے ایس جے ہاشم، مرکزی خلیفہ جماعت المسلمین بھٹکل کے جنرل سکریٹری محمد سعدا میراں ، بھٹکل مسلم یوتھ فیڈریشن کے صدر امتیاز ادیاور، بلدیہ کے سابق صدر محمد صادق مٹا وغیرہ موجود تھے۔