بھٹکل: مرڈیشور سمندر میں ڈوبنے والے ایک سیاح کو لائف گارڈ نے دی نئی زندگی
بھٹکل17/جون (ایس او نیوز) تعلقہ کے سیاحتی مقام مرڈیشور میں آج بنگلور کے ایک سیاح کو لائف گارڈ نے ڈوبنے سے بچالیا اور ایک نئی زندگی عطا کی جس کی شناخت یوراج (36) کی حیثیت سے کی گئی ہے۔ وہ بنگلور کے سری رام پورا کا رہنے والا ہے۔
مرڈیشور پولس نے بتایا کہ سری رام پورہ سے سیاحوں کی ایک ٹیم آج اتوار صبح مرڈیشور سمندر میں تیررہے تھے کہ اُن میں سے ایک سیاح یوراج کچھ آگے گہرے سمندر میں نکل گیا، جہاں سے اُس کے لئے واپس آنا مشکل ہوگیا۔ وہ اُونچی اُٹھتی لہروں کی زد میں اس بری طرح پھنس گیا کہ اُس کی جان کے لالے پڑ گئے اور کچھ ہی دیر میں وہ غوطے کھانے لگا، کنارے پر موجود لائف گارڈ کے ایک اہلکار جیارام کوپّا ہری کانت کی جیسے ہی اس پر نظر پڑی وہ اُسے بچانے کے لئے سمندر میں کود گیا۔ قریب میں ایک بوٹ پر موجود دو ماہی گیروں نے بھی سیاح کو سمندر میں ڈوبتے دیکھ کر فوری اُس کی مدد کے لئے پہنچ گئے۔ اور تینوں نے مل کر سیاح کو پانی سے نکال دیا اور کنارے لانے میں کامیاب ہوگئے۔
کنارے پر موجود کافی لوگوں نے ڈوبتے سیاح کی مدد کرنے پر لائف گارڈ اور دونوں ماہی گیر وامن ہری کانت اور منجوناتھ بابو ہری کانت کی کافی سراہنا کی اور اُن کا بے حد شکریہ ادا کیا۔
خیال رہے کہ دنیا بھر میں مشہور و معروف سیاحتی مقام مرڈیشور میں ہزاروں لوگ سیاحت کے لئے ہوتے ہیں، حالانکہ یہاں تعلقہ انتظامیہ کی جانب سے سمندر میں نہ اُترنے کے لئے وارننگ کے بڑے بڑے بورڈ اویزاں کئے گئے ہیں، اس کے بائوجود چوری چھپے کچھ لوگ سمندر میں تیرنے کے لئے اُترجاتے ہیں اور باہر سے آئے ہوئے لوگ ہی سمندر میں غرق ہوجاتے ہیں۔