منڈگوڈ،24مارچ (ایس او نیوز؍نذیر تاڑپتری) جنوبی کنڑا ضلع لوک سبھا حلقہ کے متوقع جنتا دل( ایس) امیدوار آنند اسنوٹیکر نے کہا کہ اننت کمار ہیگڈے مودی کے نام سے ووٹ طلب کرنے کی بجائے اپنے نام سے ووٹ طلب کریں انہیں حقیقت کا پتا چلے گا۔ یہاں ایک نجی ہوٹل میں طلب کردہ اخباری کانفرنس سے خطاب کرتے ہوئے آنند اسنوٹیکر نے اس خیال کا اظہار کیا اور کہا کہ 25سال سے تعلقہ اور ضلع کے مسائل کو لے کر ہیگڑے نے کبھی پارلیمان میں آواز نہیں اٹھائی ۔لیکن ایک مرتبہ آئین میں تبدیلی کا بیان جاری کرنے کے بعد ملک بھر میں مخالفت کے بعد پارلیمان میں کھڑے ہوکر معافی مانگی۔

انہوں نے کہا کہ ہیگڈے نے ضلع کا نام بدنام کیا ہے جبکہ وزیر اعظم مودی نے اب تک اپوزیشن کے کسی بھی لیڈر کے خلاف نازیبا کلمات کا استعمال نہیں کیا ہے۔ انہوں نے کہا کہ اننت کمار ہیگڈے ضلع کے لئے کینسر کی مانند ہیں اس لئے حلقہ کے عوام اس مرتبہ انہیں مسترد کرکے ایک موقع اگر اسنوٹیکر کو دیں تو ہر 40دن میں ایک مرتبہ تعلقہ کا دورہ کرکے عوامی مسائل حل کرنے کی کوشش کریں گے۔

اسنوٹیکر نے بتایا کہ اننت کمار ہیگڈے نے پہلی مرتبہ عیدگاہ میدان میں جھنڈا لہراکر، دوسری مرتبہ واجپائی کے نام پر، تیسری مرتبہ بنگارپا کی بی جے پی میں شمولیت کی وجہ سے، چوتھی مرتبہ مودی لہر سے منتخب ہوئے ہیں۔ انہوں نے سوال کیا کہ مسلسل پانچ مرتبہ پارلیمان کے لئے منتخب ہیگڈے نے ضلع اور تعلقہ کی ترقی کے لئے کیا کارنامہ انجام دیا ہے۔ صرف ہندو مذہب کی آڑ میں فرقہ وارانہ کشیدگی پھیلا کر ضلع میں ہم آہنگی متاثر کرنے کاکام کیا ہے۔ انہوں نے کہا کہ بطور مرکزی وزیر برائے اسکل ڈیولپمنٹ ہیگڈے نے روزگار فراہم کرنے کیا قدم اٹھایا ہے جبکہ ضلع میں روزگار کے بے شمار مواقع موجود ہیں۔

انہوں نے بتایا کہ ضلع میں سی برڈ، کائیگا کے پانچویں اور چھٹے ریاکٹر کا قیام کیا جارہا ہے ۔ جہاں15 تا 20ہزار روزگار کے مواقع پیدا ہوں گے۔ اسی طرح منڈگوڑ تعلقہ میں نوجوانوں کو تقریباََ 1000 روزگار کے مواقع حاصل ہوں گے اگرانہیں اس مرتبہ موقع دیا گیا تو روزگار فراہم کرنے کو اہمیت دیں گے۔اس موقع پر ڈاکٹر ششی بھوشن ہیگڈے، جنتا دل ( ایس ) کے ضلع صدر جی آر نائک، ریاستی جنرل سکریٹری مناف مرزانکر، تعلقہ صدر ملیکارجن کٹری و دیگر حاضر رہے۔