کنڑازبان کے مشہور اسلامی مقرر ،قرآن پروچن کے ماہر محمدکوئیں، رُدراکشی مٹھ بیلگام کے ’سیوا رتن‘ ایوارڈ کے لئے منتخب
بنگلورو:04؍دسمبر(ایس اؤ نیوز)ریاست بھر میں بزبان ِکنڑا اپنے قرآن پروچن، اسلامی پروچن ، بیانات سے مختلف دھرموں کے درمیان بھائی چارہ، مساوات، مذہبی یک جہتی کے قیام کے لئے کوشاں اورکنڑا زبان میں برادران وطن کے درمیان اسلام کا صحیح تعارف پیش کرنے والی دعوتی سرگرمیوں میں متحرک منگلوروشانتی پرکاشن کے مینجر ، جماعت اسلامی ہند کرناٹکا کے سکریٹری حلقہ جناب محمد کوئیں کو بیلگام کے ناگنور شری ردراکشی مٹھ کی جانب سے دئیےجانے والے ’سیوا رتن‘ایوارڈ کے لئے منتخب کیاگیا ہے۔
’ناگنور سوامی جی ‘ سے معروف ریاست کرناٹکا کے سرحد ی علاقے بیلگام کے ناگنور کے رودراکشی مٹھ کی جانب سے سماجی سطح پر خدمات انجام دینےو الی اور باہمی رفاقت، بھائی چارگی ، یک جہتی کے فروغ دینے والی شخصیات کو ’ سیوارتن ‘ایوارڈ سے نوازاجاتاہے اور خود مٹھ کے ذمہ داران ریاست کی مشہور شخصیات کو منتخب کرتی ہیں۔ مٹھ کے مشہور و معروف سوامی جی ڈاکٹر شیو بسوا مہا سوامی جی کی 130ویں جینتی کے موقع پر 7دسمبر2019کو محمد کوئیں ایوارڈ سے نوازے جانے کی ناگنور شری ردراکشی مٹھ کے شری سدرام سوامی جی نے جانکاری دی ہے۔
گزشتہ کئی برسوں سے ریاست کرناٹکا کے مختلف مقامات پر توحید، رسالت، آخرت، اسلام میں خواتین کے حقوق، اسلام میں مذہبی رواداری جیسے اہم موضوعات پر ایک روزہ، دو روزہ، سہ روزہ قرآن پروچن کے ذریعے برادران وطن میں کنڑازبان میں اسلام کا صحیح پیغام پہنچاتے ہوئے آپسی بھائی چارگی اور خیرسگالی کا پیغام دینےو الے محمد کوئیں ، کنڑا زبان میں اسلام پھیلانے والے اشاعتی ادارے شانتی پرکاشن کے مینجر کی حیثیت سے بھی خدمات انجام دے رہے ہیں۔ اسی طرح برادران وطن کے ساتھ رابطہ و تعلقات پیدا کرتے ہوئے حالات کو سازگار بنانےمیں اہم رول ادا کرنے والے جماعت اسلامی ہند کرناٹکا کے ’’سدبھاؤنا ویدیکے ‘‘ کے ریاستی سکریٹری کی حیثیت سے بھی سرگرم ہیں۔