منگلورو14/اپریل (ایس او نیوز)کیرالہ سے جڑنے والی منگلورو کی سرحد پر کڑی چوکسی برتی جارہی ہے اور سپریم کورٹ کی ہدایت کے بعد ریاستی حکومت کے حکم کے مطابق چیک پوسٹ پرپولیس کے ذریعے دستاویزات کا جائزہ لینے اور ڈاکٹروں کی طرف سے مریضوں کی طبی جانچ کرنے کے بعد ہی ایمرجنسی علاج کی ضرورت والے عام مریضوں کو منگلورو میں داخلے کی اجازت دی جارہی ہے۔
ضلع انچارج وزیر اور اراکین پارلیمان نے منگلورو کیرالہ سرحد پر تلپاڈی میں قائم چیک پوسٹ کا معائنہ کرنے کے بعد وہاں برتی جارہی چوکسی کی ستائش کی ہے۔ انہوں نے بتایا کہ ڈاکٹروں کی ٹیم مریض کا پوری طرح معائنہ کرنے اور کورونا وائرس سے متاثر نہ ہونے کا یقین کرلینے کے بعد ہی مریض کی ایمبولینس کو منگلورو سرحد میں داخل ہونے کی اجازت دے رہی ہے۔اس وجہ سے اب اس علاقے میں کوئی الجھن نہیں ہے۔ خیال رہے کہ ایسے مریضوں کو ڈیرلکٹہ میں واقع ہیگڈے اسپتال میں ہی علاج کی سہولت فراہم کی جاتی ہے۔
ضلع انچارج وزیر نے بتایا کہ جنوبی کینرا میں کورونا وباء قابو میں آگئی ہے۔ فی الحال 12مریضوں میں سے بیشتر مریض تندرست ہوکر اسپتال سے ڈسچارج ہوگئے ہیں۔