منگلورو22/دسمبر (ایس او نیوز) کیرالہ سے سی پی ایم کے رکن راجیہ سبھا بنوئے وسوام اور چند پارٹی کے کارکن منگلورو میں کرفیو کی خلاف ورزی کرتے ہوئے سی اے اے کے خلاف احتجاج کررہے تھے، انہیں پولیس نے حراست میں لے لیا۔ 

ذرائع کے مطابق یہ لوگ سی اے اے کے خلاف مظاہرہ کرتے ہوئے ہندوستان بچاؤ اور جمہوریت بچاؤ کے نعرے لگارہے تھے اس کے علاوہ مظاہرین کے خلاف یڈیورپا حکومت کی جانب سے کی جارہی کارروائی پر بھی انہوں نے تنقید کی۔ پولیس نے بھی یہ تصدیق کی ہے کہ بشمول بنوئے وسوام 6لوگوں کو حراست میں لیا گیا ہے۔ 

دریں اثناء پولیس نے سابق وزیر اعلیٰ سدارامیا پر بھی منگلورو داخل ہونے پر پابندی لگادی ہے۔ منگلورو میں جمعرات کے دن احتجاجی مظاہرہ کے دوران پولیس فائرنگ میں دو افراد شہید ہوگئے تھے۔ منگلورو کے پولیس کمشنر بی ایس ہرشا نے سدارامیا کو منگلورو میں داخلہ پر پابندی لگاتے ہوئے نوٹس جاری کیا گیا ہے۔ بروز اتوار کی آدھی رات تک سدارامیا منگلورو میں داخل نہیں ہوسکتے۔ نوٹس میں یہ بھی کہا گیا ہے کہ سدارامیا شہر بنگلورو، ہبلی، میسورو اور گوا ائیر پورٹوں سے اتوار کی شب تک کہیں بھی سفر نہیں کرسکتے۔ سدارامیا پر روڈ، ریل اور فضائیہ کے ذریعہ سفر پر پابندی ہے۔ نوٹس میں یہ بھی درج ہے کہ ان کے سفر کا کوئی شخص انتظام نہیں کرسکتا۔ سینئر کانگریس لیڈروں پر مشتمل ایک وفد جو منگلورو پہنچا تھا، وہ احتجاجی مظاہرہ میں زخمی ہونے والے اور شہید ہونے والوں وارثوں سے ملاقات کرنا چاہتے تھے۔ لیکن پولیس نے انہیں ملاقات کی اجازت نہیں دی اور انہیں ایئر پورٹ پر ہی حراست میں لے لیاگیا۔ اس وقت میں ایس آر پاٹل، سابق وزیر امور ایم بی پاٹل، سابق اسپیکر کے آر رمیش کمار اور سابق رکن پارلیمان وی ایس اگرپا شامل ہیں۔ ان کے سفر پر پابندی عائد کرنے کی خبر سن کر سدارامیا نے اپنا دورہ منگلورو منسوخ کردیا ہے۔ پولیس کمشنر بی ایس ہرشا نے بتایا کہ بنگلورو انٹر نینشل ائیر پورٹ اتھارٹی کی ہدایات پر سدارامیا کو نوٹس جاری کیا گیا ہے۔