منگلورو:شریمتی شیٹی کے بہیمانہ قتل میں ملوث میاں بیوی گرفتار
منگلورو15/مئی (ایس او نیوز) شریمتی شیٹی کا بہیمانہ قتل کرنے اور اس کا جسم کاٹ کراور مختلف ٹکڑوں کو تھیلے میں بھرکر کدری پارک کے پاس ایک دکان کے قریب چھوڑ دینے کے الزام میں پولیس نے جوناس سیمسن(36سال) اور اس کی بیوی وکٹوریہ ماتھیاس(46سال) کو گرفتار کرلیا ہے۔اس جوڑے کے ذریعے شریمتی کو اس طرح وحشیانہ طرز پر قتل کرنے کا سبب مالی لین بتایا جاتا ہے۔
پولیس کے بیان کے مطابق جوناس سے شریمتی شیٹی سے ایک لاکھ روپے قرض لیا تھا جس میں سے کچھ رقم اس نے واپس لوٹائی تھی۔ شریمتی شیٹی بقیہ رقم کے لئے تقاضہ کررہی تھی اور جوناس اسے ٹال رہا تھا۔ پھر 11مئی کو شریمتی شیٹی اپنے بقیہ 60ہزار روپے وصول کرنے کے لئے جوناس کے گھرپہنچی تو وہاں پر میاں بیوی نے مل کر شریمتی کا اس انداز میں قتل کردیا گیا کہ درندگی کی حد کردی۔گمان کیا جاتا ہے کہ جسم کوکاٹنے کے لئے مشین کا استعمال کیاگیاتھا۔ جسم کے بہت سے ٹکڑے الگ الگ مقامات پر پھینک دئے گئے تھے، جن میں کچھ ابھی دستیاب ہونا باقی ہے۔
پولیس نے جب ملزمین کو گرفتار کرنے لگی تو جوناس نے خود کشی کی کوشش کی۔ جوناس کو علاج کے لئے اسپتال میں داخل کیاگیا ہے۔ تحقیقات کے دوران پولیس نے شریمتی کا اسکوٹر، اس کی آٹھ انگوٹھیاں اور ایک گلے کی چین بر آمد کرلی ہے۔اس کیس کو حل کرنے میں پانڈیشور، کنکناڈی اورمنگلور سینٹرل پولیس اسٹیشن کے افسران اور عملے نے حصہ لیا۔