منگلورو : ریاستی وزیر داخلہ نے دیا غیر قانونی طور پر مقیم غیر ملکیوں کے سروے کا حکم
منگلورو ،28 ؍ جون (ایس او نیوز) ریاستی وزیر داخلہ آراگا جیانیندرا نے بتایا کہ انہوں نے منگلورو اور جنوبی کینرا پولیس اسٹیشنوں کے حدود میں غیر قانونی طور پر مقیم غیر ملکیوں کی تفصیلات جمع کرنے کا حکم دیا ہے ۔
منگلورو پولیس کمشنر کے دفتر میں منعقدہ اعلیٰ پولیس کی میٹنگ کے بعد نامہ نگاروں سے خطاب کرتے ہوئے انہوں نے کہا کہ اپنی منظور شدہ قیام کی مدت سے تجاوز کرکے یہاں رہنے والے غیر ملکیوں کا سروے کرنے کے لئے پولیس کو پندرہ دن کی مہم چلانے کو کہا گیا ہے جس کے دوران ویزا یا پاسپورٹ کی مدت ختم ہونے کے باوجود یہاں پر مقیم غیر ملکیوں کا پتہ لگایا جائے گا اور یہ جانکاری بھی حاصل کی جائے گی کہ غیر قانونی طور پر مقیم غیرملکیوں نے کہیں آدھار کارڈ ، ووٹر شناختی کارڈ ، راشن کارڈ وغیرہ تو نہیں بنوائے ہیں ۔
انہوں نے پچھلے دنوں اپنی مدت قیام سے زیادہ سے رہنے والے 32 غیرملکی باشندے بینگلورو میں پکڑے جانے کا حوالہ دیتے ہوئے کہا کہ ایسے لوگ ملک کے دوسرے حصے میں بھی گھسنے امکانات موجود ہیں ۔ اس لئے ان کی نشاندہی کے لئے خصوصی مہم چلانے کی ہدایت دی گئی ہے ۔
جنوبی کینرا میں مجرمانہ وارداتوں کے سلسلے میں عدالت سے سزا ملنے کی شرح فیصد بہت کم ہونے کے تعلق سے جیانیندرا نے بتایا کہ :" یہاں عدالت سے سزا ملنے کی شرح 12-13 فیصد ہے جو کہ اطمینان بخش نہیں ہے ۔ کسی مقدمہ کی پہلی سماعت شروع ہونے میں 2-3 سال لگ جاتے ہیں ۔ تب تک گواہ مکر جاتے ہیں اور فریقین عدالت سے باہر تصفیہ کر لیتے ہیں ۔ مجرموں کو سزا دلانے کی شرح بڑھانے کے لئے میں نے پولیس کمشنر اور ایس پی کو ہدایت دی ہے کہ استغاثہ کے افسران کے ساتھ بار بار میٹنگ منعقد کرتے رہیں ۔ چونکہ استغاثہ کے افسران نے سرکاری وکیلوں اور دیگر معاون عملہ کی کمی کا ذکر کیا ہے اس لئے نئے عملہ کی بھرتی کے لئے اقدامات کیے جائیں گے ۔
وزیر موصوف نے مزید بتایا کہ امسال 200 ہزار کروڑ روپے کی لاگت سے ریاست میں پہلی مرتبہ 100 پولیس اسٹیشنوں کی عمارتیں تعمیر کی جائیں گی ۔ اس کے علاوہ ہم نے پولیس عملہ کے لئے 11 ہزار کوارٹرس بھی تعمیر کیے ہیں ۔
اس موقع پر ویسٹرن زون کے آئی جی پی دیواجیوتی رے ، پولیس کمشنر این ششی کمار اور سپرنٹنڈنٹ آف پولیس رشی کیش بھگوان سوناونے موجود تھے ۔