منگلورو 5؍مارچ (ایس اونیوز)تین مختلف معاملات میں منگلوروایئر پورٹ کے کسٹمز افسران نے 19.14لاکھ روپے مالیت کا 549.98گرام سونااور 18.10لاکھ روپے کی غیر ملکی کرنسی ضبط کی ہے۔اوراس معاملے میں تین افراد کو گرفتار کرلیا ہے۔

موصولہ رپورٹ کے مطابق کسٹمزکے ایئر انٹلی جنس شعبے نے کارروائی کرتے ہوئے دبئی روانگی کے لئے تیار ایک مسافر کو گرفتار کیا او راس کے پاس سے امریکی ڈالرز، یورو، عمانی ریال اور کویتی دینار ضبط کیے۔یہ کرنسی مسافر کے لگیج بیگ میں کپڑوں کے اندر چھپائی گئی تھی۔اسی طرح دبئی سے ایئر انڈیا فلائٹ کے ذریعے آنے والے ایک مسافر کے پاس سے 232.62گرام 24قیراط سونا ضبط کیا گیا جس کی مالیت 7.68لاکھ روپے بتائی جاتی ہے۔بتایاجاتا ہے کہ یہ سونا گول پلیٹوں کی شکل میں تھا جس پر چاندی کا ملمع چڑھایا گیاتھا اوران پلیٹوں کوایک کوکر کے اندر رکھا گیا تھا۔مصدقہ اطلاع کے بنیاد پرجب مذکور ہ مسافر کی سختی کے ساتھ تلاشی لی گئی تو سونا اسمگل کرنے کا یہ معاملہ سامنے آیا۔

تیسرے معاملے میں کسٹمز کے افسران نے دبئی سے آنے والے ایک مسافر سے سختی کے ساتھ تفتیش کی تو پتہ چلا کہ اس نے اپنے مقعد میں 317.36 گرام24قیراط سونے کا پاؤڈر چھپارکھا ہے۔ سونا برآمد اور ضبط کرنے کے ساتھ مسافر کو حراست میں لیا گیا۔