شموگہ میں زبردست بارش کے نتیجے میں ہوناور کے شراوتی ندی کے اطراف رہنے والوں کے لئے بج گئی خطرہ کی گھنٹی؛ ڈیم سے کسی بھی وقت پانی چھوڑے جانے کی وارننگ
بھٹکل 22 ستمبر (ایس او نیوز) پڑوسی ضلع شموگہ میں زبردست بارش کے بعد لنگن مکّی ڈیم میں پانی کی سطح کافی حد تک بڑھ گئی ہے جس کو دیکھتے ہوئے کرناٹکا پاور کارپوریشن (کے پی سی ایل) کی طرف سے ہوناور تعلقہ کے شراوتی ندی کے اطراف بسنے والوں کے لئے خطرے کا الارم بجا دیا گیا ہے اور ندی کے اطراف بسنے والے دیہات کے لوگوں کو وارننگ دی گئی ہے کہ اگر بارش کا سلسلہ اسی طرح جاری رہا تو لنکن مکّی ڈیم سے کسی بھی وقت پانی کا اخراج کیا جاسکتا ہے، لہٰذا محفوظ مقامات کی طرف کوچ کرنے کے لئے تیار رہیں۔
کے پی سی ایل کی طرف سے جاری فائنل نوٹس میں بتایا گیا ہے کہ لنگن مکی ڈیم میں 1819 فٹ تک پانی کو جمع رکھا جاسکتا ہے جبکہ آبی ذخیرہ والے علاقوں میں بھاری بارش کی وجہ سے لنگن مکی ڈیم میں آج منگل صبح آٹھ بجے تک پانی کی سطح بڑھ کر 1812.30 فٹ تک پہنچ گئی ہے۔ ایسے میں بارش کا سلسلہ یوں ہی جاری رہا اور پانی کی سطح مقررہ حد کو پارکرتی ہے تو پھر ڈیم سے پانی چھوڑا جاسکتا ہے۔ اس لئے شراوتی ندی کنارے رہنے والے ہوشیار رہیں اور کسی بھی وقت محفوظ مقامات کی طرف کوچ کرنے کے لئے تیار رہیں۔
راحت کیمپ: ہوناور ریوینیو ڈپارٹمنٹ کے افسران نے بتایا کہ ہوناور تعلقہ کی گونڈبال ندی میں برساتی پانی بھرجانے کی وجہ سے ندی کناروں سے پانی ابل کر رہائشی علاقوں میں گھس رہا ہے اور اس خطرے کو دیکھتے ہوئے چکن گوڈ لوئر پرائمری اسکول میں ریلیف کیمپ قائم کیا گیا ہے۔ پتہ چلا ہے کہ کیمپ میں بعض خاندانوں کو منتقل بھی کیا گیا ہے۔
