اُڈپی 18 / دسمبر (ایس او نیوز) ضلع کے کاوپ میں لیلا دھر شیٹی نامی سوشیل ورکر کی گود لی ہوئی بیٹی گھر سے غائب ہونے کے بعد اس لڑکی کے پالک میاں بیوی کی خود کشی کا جو معاملہ پیش آیا تھا اس ضمن میں پولیس نے چارملزمین کو گرفتار کر لیا ہے جن کی شناخت لڑکی کے عاشق  گریش (20 سال)، روپیش  (22 سال)، جینت (23 سال) اور محمد عزیز کے طور پر کی گئی ہے ۔ 

پولیس کا کہنا ہے کہ لیلادھر شیٹی کی گم شدہ لے پالک لڑکی اورچاروں ملزمین کو کاسرگوڈ ضلع کے کمبلے کے قریب سے ڈھونڈ نکالا گیا ہے۔

بتایا جاتا ہے کہ شیٹی جوڑے نے بانجھ پن کی وجہ سے ان کے یہاں بچہ پیدا ہونے کی گنجائش نہ ہونے پر 16 سال قبل اس لڑکی کو گود لیا تھا ۔ جس دن یہ لڑکی گھر سے غائب ہوگئی اسی رات کو اس جوڑے نے صدمے کی وجہ سے اپنے ہی گھرمیں پھانسی لگا کر خود کشی کرلی ۔ جس کے بعد پولیس نے خود کشی اور گمشدگی کے دو الگ الگ معاملے درج کر لیے تھے۔ 

معلوم ہوا ہے کہ ملزم گریش پر پہلے سے ہی اغوا، عصمت ریزی جیسے معاملات  کے علاوہ پوکسو کے تحت کیس درج ہیں ۔ جبکہ گریش کے دیگر تین ساتھیوں پر بھی پوکسو کے تحت کیس درج ہیں ۔