کاروار: دہشت گردانہ سرگرمیوں سے نپٹنے کے لئے سیکیوریٹی تیاری کی جانچ ۔ ساحلی علاقے میں ہورہی سالانہ ’ساگر کَوَچ‘ مشق
کاروار8 ؍اکتوبر (ایس او نیوز) ساحلی علاقے میں دہشت گردوں کی طرف سے بم دھماکے اور دیگر تخریبی کارروائیوں سے نپٹنے کے لئے پولیس ، کوسٹل سیکیوریٹی پولیس اور کوسٹ گارڈ ز کی طرف سے جوسیکیوریٹی انتظامات اور چوکسی کی جانچ ’ساگر کَوَچ‘ مشق کے ذریعےکی جارہی ہے جس میں علامتی طورپر مشتبہ دہشت گرد و ں کو گرفتار کرنے اور بم دھماکو روکنے کی سرگرمیاں انجام دی گئیں۔
خیال رہے کہ سمندری راستے سے دہشت گردوں کی آمد اور اس علاقے میں تخریبی کارروائیوں کے امکانات دیکھتےہوئے یہاں پرہر سال ’ساگر کَوَچ‘ مشق کا اہتمام کیا جاتا ہے جس میں شاہراہوں پر نقلی یا علامتی دہشت گردوں کو دبوچا جاتا ہے یا بموں کو ناکام بنانے کی کارروائیاں انجام دی جاتی ہیں۔اس سے مقامی اور ضلعی سطح پر پولیس اور سیکیوریٹی کی چوکسی کاامتحان لینا مقصود ہوتا ہے۔ اگر انجان لوگوں کی طرف سے تخریبی کارروائی کی اطلاع ملنے پر متعلقہ علاقے میں پولیس کارروائی کرنے میں ناکام ہوتی ہے اور پہلے سے طے شدہ نقلی دہشت گردوں کو گرفتار نہیں کرپاتی تو اسے حفاظتی دستے کی کوتاہی تصور کیا جاتا ہے۔
ضلع پولیس سپرنٹنڈنٹ شیوا پرکاش نے بتایا کہ امسال یہ کارروائی 7 اور 8اکتوبر کو بھٹکل سے کاروار تک ساحلی علاقے میں انجام دی جارہی ہے جس میں شاہراہ پر موٹر گاڑیوں کی چیکنگ اور عوامی مقامات پردہشت گردوں کو اچانک دھر دبوچنے اور کچھ متعینہ مقامات پر لگائے گئے بموں کو ناکام کرنے کی کارروائیاں کی جائیں گی۔اس مشق میں پولیس ، کوسٹل پولیس ، کوسٹ گارڈ، نیوی سمیت تمام حفاظتی دستے حصہ لے رہے ہیں۔
