کاروار:24؍اگست(ایس اؤ نیوز) افغانستان کے صدر مقام کابل میں ڈرائیور کی حیثیت سے ملازمت کرنے والے کاروار تعلقہ سداشیوگڑھ کے راجیش پڈولکر منگل کو بحفاظت گھر لوٹنے پر گھروالوں نے راحت کی سانس لی ہے۔

راجیش کے متعلق بتایا گیا ہے کہ وہ پچھلے تین برسوں سے کابل میں ملازمت کررہے تھے ۔ امریکن فوج کو غذا سپلائی کرنے والی کمپنی ’ایکولاگ‘ نامی ادارے میں کام کررہے تھے۔ افغانستان پر طالبان کا قبضہ ہونے کے بعد حالات بگڑ گئےتو راجیش امریکہ کی فو ج کی پناہ میں تھے۔

راجیش کو کابل سے بذریعہ ہوائی جہاز قطر پہنچایاگیا ۔ پھر وہاں سے انڈین ائیر فورس نے اپنی ہوائی جہاز کے ذریعے دہلی پہنچایا۔اس کے بعد راجیش گوا سے ہوتے ہوئے منگل کی صبح اپنے گاؤں پہنچ گئے۔ افغانستان کے حالات پر اخبارنویسوں کو بتاتے ہوئے راجیش نے کہاکہ 14اگست کو امریکن فوج نے  حالات بگڑنے کے متعلق جانکاری دی ۔ تب تک طالبان نے کابل کو چھوڑ کر پورے علاقوں پر قبضہ جما لیا تھا۔ میری طرح نیپال، سری لنکا اور یوگانڈا ملکوں کے لوگ بھی کام پر تھے۔ قریب 20ہزار لوگ ہوائی اڈے پر جمع تھے۔  اپنے وطن صحیح سلامت پہنچنے پر انہوں نے  خوشی کا اظہار کیا۔ انہوں نے بتایا کہ ہوائی اڈے کے باہر گولیوں کی آواز آر ہی تھی ۔ جس کے نتیجے میں  بڑی فکر ہونے لگی تھی کہ ہماری حالت کیا ہوگی ، ہروقت خوف کے سائے منڈلاتے رہتے تھے۔ اتنی ہی فکر تھی کہ کسی طرح یہاں سےنکل جائیں۔