کاروار15/مئی (ایس او نیوز) ایک خاتون کو نقلی سونے کے سکے فروخت کرتے ہوئے لاکھوں روپے کا دھوکہ دینے کی خبر کاروارشہر کے کوڈی باغ علاقے سے موصول ہوئی ہے۔

کاروار شہری پولیس تھانے میں درج شکایت کے مطابق کوڈی باغ کی ترپتی نامی خاتون کے ساتھ رامیشوری نامی خاتون نے دھوکہ دہی کی ہے۔معلوم ہواہے کہ پولیس کی تحقیقات کے دوران رامیشوری نے اپنا جرم قبول کرلیا ہے جس کے بعد پولیس نے اس سے رقم واپس کرنے کا عہدنامہ تحریر کروالیا ہے۔

 کہاجاتا ہے کہ کوڈی باغ کی ترپتی کاروار کے باڈ علاقے میں روزانہ قلی مزدوری کرتی ہے۔ رامیشوری نامی خاتون نے اس سے جان پہچان پیدا کی۔ پھر اسے روزانہ اصلی سونے کے سکے بتاکر نقلی سکے دیتی رہی اور ہزاروں روپے وصول کرلئے۔ پھر ایک دن اس نے فون کرکے بتایا کہ وہ جو سونے کا خفیہ کاروبار کررہی تھی، اس کے بارے میں پولیس کو پتہ چل گیاہے اوراس پر کیس درج کیاگیا ہے۔ ساتھ میں ترپتی کو بھی ملزم بنایاگیا ہے۔ اس کیس سے بچنے کے لئے ایک لاکھ روپے ادا کرنے ہونگے، ورنہ اُسے بھی گرفتار کرلیا جائے گا۔ ڈر کے مارے ترپتی نے اسے رقم اداکردی۔ پھر رامیشوری اسے بار بار فون کرکے بلیک میل کرتی رہی اور ترپتی اور اس کے گھر والوں کے بینک اکاؤنٹ سے بھی رقم نکلوائی۔ اس کے بعد اس نے ترپتی کو ’سنگھا‘ کا رکن بناکر وہاں سے بھی اس کے نام پر قرضہ نکلوایا۔ 

 بالآخرترپتی کورامیشوری کے ذریعے دھوکہ دہی کااحساس ہوگیا اور اس نے پولیس میں شکایت درج کروادی۔اس طرح پولیس کا خوف دکھاکر ترپتی کو بلیک میل کرنے والی رامیشوری پولیس کے ہتھے چڑھ گئی۔