کرناٹکا اُردو اکیڈمی کی جانب سے امسال بھٹکل کے دو صحافیوں کو بھی ایوارڈ؛ 2 اور3 جولائی کو ہوگی بنگلور میں تقریب
بھٹکل 16/جون (ایس او نیوز) کرناٹکا اُردو اکیڈمی نے امسال پہلی بار بھٹکل کے دو صحافیوں بھٹکل نیوز کے ایڈیٹر عتیق الرحمن شاہ بندری اور پھول میگزین کے ایڈیٹرمولوی عبداللہ دامدا ابو ندوی کو ایوارڈ سے نوازے جانے کا اعلان کیا ہے۔
اخباری بیان میں کہا گیا ہے کہ کرناٹکا اُردو اکیڈمی ہر سال زبان اُردو کی ترقی اور فروغ کے لئے مختلف شعبوں میں نمایاں خدمات انجام دینے والی شخصیات کو ایوارڈس سے نوازتی آرہی ہے، اس بار صحافت، تصنیف اور شاعری سمیت مختلف زمروں کے کل 54 لوگوں کو ایوارڈس دینے کا فیصلہ کیا ہے اور ایوارڈ تقسیم کرنے کی تقریب 2 اور 3 جولائی کو بنگلور میں منعقد ہوگی۔
واضح رہے کہ 1998 میں جب انٹرنیٹ پر بھٹکل نیوز کی شروعات ہوئی تھی تو اُس وقت ملک بھر سے چند گنے چنے اخبارات ہی انٹرنیٹ پر دستیاب تھے، بھٹکل نیوز کو ریاست کرناٹک کا پہلا آن لائن اُردو اخبار ہونے کا شرف حاصل ہے۔ بھٹکل نیوز میں مقامی خبروں کے ساتھ ساتھ ریاستی ، قومی اور عالمی خبریں پیش کی جاتی ہیں۔ اکیڈمی کی جانب سے بتایا گیا ہے کہ بھٹکل نیوز کی خدمات کو دیکھتے ہوئے ایڈیٹر جناب عتیق الرحمن شاہ بندری کو ایوارڈ کے لئے منتخب کیا گیا ہے جنہیں سند اور میمنٹو کے ساتھ ساتھ پچاس ہزار روپئے نقد بھی انعام میں دیا جائے گا۔
بھٹکل سے جاری پھول میگزین کی شروعات دوسال قبل ہوئی تھی جس کے ذریعے پھول جیسے بچوں کو جُڑنے کی تحریک چلائی گئی ہے۔ پھول کے ذریعے بچوں کی کہانیوں کو شائع کرنے کے ساتھ ساتھ اُن کی تخلیقی صلاحیتوں کو اُبھارنے کی کوشش کی جاتی ہے، بتایا گیا ہے کہ پھول میں لکھنے والے زیادہ تر مقامی لوگ ہیں اور خاص کر مقامی بچے ہی لکھتے ہیں ، اطلاع کے مطابق پھول میگزین میں بچوں کو ہی لکھنے کی ترغیب دے کر اُن کے مضامین اور کہانیوں کو اصلاح کرکے شائع کرایا جاتا ہے۔ یہ بھی بتایا گیا ہے کہ ہر ہفتہ جمعرات کو ادارے کی لائبریری میں بچوں کا جوڑ ہوتا ہے ، ہرمہینہ میں ایک پروگرام ہوتا ہے اورعلماء کی نگرانی میں سال میں ایک بڑا جلسہ منعقد کیا جاتا ہے۔ امسال اُردو اکیڈمی کی جانب سے پھول کے ایڈیٹر مولوی عبداللہ دامدا ابو کو بھی ایوارڈ سے نوازے جانے کا اعلان کیا گیا ہے جنہیں سند اور میمنٹو کے ساتھ پچیس ہزار روپئے نقد انعام دیا جائے گا۔
بھٹکل کے دو صحافیوں کو ایوارڈ سے نوازے جانے پر مختلف اداروں کی جانب سے دونوں صحافیوں کو مبارکبادی کے پیغامات موصول ہورہے ہیں۔ ادارہ ساحل آن لائن بھی ان دونوں کی خدمات میں مبارکباد اور ہدیہ تہنیت پیش کرتا ہے۔
