غزہ، 30/جنوری (ایس او نیوز/ایجنسی) اسرائیلی فوج نے مسلسل ۱۱۵؍ویں روز بھی غزہ میں درجنوں فضائی حملےکئے اور بمباری کی جس سےمزید ۱۶۵؍ فلسطینیوں کی موت ہوگئی جبکہ ۲۶۰؍ افراد زخمی ہوگئے۔ مرکزی اطلاعات فلسطین کے مطابق  ہمارے نامہ نگاروں نے اطلاع دی ہے کہ اسرائیلی فوج کے طیاروں اور توپ خانے نے پیر کو غزہ میں خان یونس پر جارحیت کے دوران گھروں، بے گھر افراد اور سڑکوں کو نشانہ بناتے ہوئے اپنے چھاپے مارے اور بمباری کا سلسلہ جاری رکھا جس میں سیکڑوں افراد ہلاک اور زخمی ہوگئے۔   صحافی حسام شباط نے بتایا کہ غزہ کے شہر الرمل میں پناہ گاہوں میں بیت حنون شہر سے بے گھر ہونے والوں پر بمباری کی گئی جس سے۱۳؍ فلسطینیوں کی موت ہوگئی۔ اسرائیلی فوجیوں نےگھروں میں گھس کر شہریوں کو مشکل حالات میں نکلنے پر مجبور کیا۔ 

شہاب کے نامہ نگار نے گزشتہ رات سے پیرکی صبح تک غزہ پر جاری اسرائیلی جارحیت کے دوران پیش آنے والے واقعات کی تفصیل بتائی ہے۔ طیاروں نے شہید رفیق دغمش کے اہل خانہ کے گھر پر بمباری کی جس سے متعدد افراد کی موت ہوگئی اورلوگ زخمی ہوگئے۔  غزہ شہر کے الصبرہ محلے میں الایمان مسجد کے قریب عنائم خاندان کے گھر پر بمباری کی گئی۔  الشاطی کیمپ پر بمباری میں متعدد افراد کی موت ہوگئی اور کئی افراد زخمی ہوگئے۔ زخمیوں کو الشفاء اسپتال منتقل کیا گیا۔  الصبرہ کے محلے میں واقع اسلامی کمپلیکس مسجد کے قریب الجماسی خاندان کے نوجوانوں پر بمباری میں متعدد کی موت ہوگئی اور کئی زخمی ہوگئے۔  غزہ شہر میں الشرفہ خاندان کے اپارٹمنٹ کو نشانہ بنایا گیا جس میں ۳؍ کی موت ہوگئی جبکہ دیگر ۶؍ زخمی ہوگئے۔

رات گئے اور صبح کے وقت تل الحوا، الصبرہ، الرمل اور الشفاء کے علاقوں میں گولہ باری کی گئی۔  فلسطینی طبی عملے اور رہائشیوں کا کہنا ہے کہ اسرائیل نے خان یونس کے دو اہم اسپتالوں کے آس پاس کے علاقوں پر بمباری جاری رکھی ہے جس کے باعث بمباری میں پھنسے لوگوں کی مدد میں رکاوٹ پیدا ہو رہی ہے۔  غزہ کی وزارت صحت کے ترجمان اشرف القدرہ نے کہاکہ ’ ’ناصر اور العمل اسپتالوں میں طبی سہولیات کا نظام مکمل طور پر ناکام ہو چکا ہے۔ ‘‘

فلسطینی ریڈ کریسنٹ سوسائٹی نے ایک بیان میں کہا ہے کہ خان یونس کے العمل اسپتال میں طبی ٹیمیں آکسیجن کی فراہمی ختم ہونے کی وجہ سے سرجری نہیں کر پا رہی ہے۔ 

غزہ پٹی کے دیگر حصوں سے بھی لڑائی میں شدت کی اطلاعات موصول ہوئی ہیں۔  غزہ کی وزارت صحت کے ترجمان اشرف القدرہ کے مطابق گزشتہ۲۴؍گھنٹوں کے دوران مزید۱۶۵؍ فلسطینیوں کی موت ہوگئی اور ۲۹۰؍ زخمی ہوگئے۔ واضح رہے کہ گزشتہ سال ۷؍ اکتوبر کے بعد اسرائیلی جارحیت میں مرنے والے فلسطینیوں کی تعداد ۲۶؍ ہزار۴۲۲؍ ہو گئی ہے جن میں زیادہ ترعام شہری ہیں۔