اُڈپی:22؍مارچ  (ایس اؤ نیوز) انڈین نوائط فورم (آئی این ایف ) کا سالانہ جلسہ اُڈپی کے پرائیویٹ ہوٹل میں آئی این ایف کے صدر عبدالمجید جوکاکو کی صدارت میں منعقد ہوا۔

بھٹکل سے تعلق رکھنے والے ملک کے مختلف شہروں میں مقیم افراد پر مشتمل یہ ادارہ مختلف سماجی و فلاحی کاموں کوانجام دیتاہے۔ آئی این ایف میں کولکتہ ، ممبئی ، آندھراپردیش، چنئی ، مڈکیری ، بنگلورو، منگلورو سمیت مختلف شہروں میں رہنےو الے حضرات نے سالانہ جلسےمیں شریک ہوکر آئندہ لائحہ عمل کے متعلق اپنے قیمتی مشوروں سے نوازا ۔ جنرل سکریٹری معاذجوکاکو نے سالانہ آمد و خرچ کاحساب کتاب پیش کیا۔ اور اجلاس میں ایک سالہ کارکردگی کے علاوہ اہم معاملات پر غوروخوض کیاگیا۔

جلسے میں خاص کر بھٹکل میں طبی میدان میں پسماندگی کو لےکر فکر جتائی گئی ۔ بھٹکل کے عام ، غریب لوگوں کو معمولی علاج کے لئے بھی منگلورو، اُڈپی اور کنداپور جانامجبوری ہے۔ اس سلسلےمیں مناسب اقدامات اٹھاتےہوئے بھٹکل میں بہتر ڈاکٹروں کا تقرر کرتےہوئے شہریوں کو طبی میدان میں سہولیات فراہم کرنے پر سبھی نے اتفاق کیا۔ اجلاس میں فیصلہ لیاگیا کہ بھٹکل میں ایک آئی سی یو سہولیات والی ایمبولنس لائی جائے گی۔ اسی طرح منگلورو کے ڈاکٹروں سے گفتگو کرتے ہوئے بھٹکل میں ان کی خدمات کو حاصل کرنےکی کوشش کی جائےگی۔ کووڈکے دوران خلیجی ودیگر ممالک سےلوٹے افراد کا مناسب انتظام اور بھٹکل اور شرالی کے اسپتال میں فلاحی خدمات کئے جانے پر متعلقہ اداروں کی طرف سے آئی این ایف کی ستائش کئے جانے کی جانکاری دی گئی ۔ آئی این ایف کی طرف سے بھٹکل کے ویلفئیر اسپتال میں 4اپریل سے نئے طورپر ڈیالسس سنٹر شروع ہونے کی بات بتائی گئی ۔

اجلاس میں ایک اہم فیصلہ لیاگیا کہ مستقبل میں آئی این ایف کی طرف سے خواتین کے لئے ورک شاپ، روزگار میلہ ، ہنرمندا ور قابل خواتین کو چھوٹے موٹے روزگار کا مواقع فراہم کرنا ، سلائی مشین کی تقسیم کاری ، بیواؤں کو تعاون دیاجائے گا۔ نائب صدر محتشم ارشد ایس ایم نے شکریہ اداکیا۔ ڈائس پر نائب صدر فیاض غنی محتشم ، سیفان احمد ، عمر خلیفہ وغیرہ موجود تھے۔