نئی دہلی، 24/اکتوبر (ایس او نیوز /ایجنسی) سابق ہندوستانی کپتان اور مایہ ناز اسپن گیندباز بشن سنگھ بیدی کا 77 سال کی عمر میں  کل  انتقال ہو گیا۔ بشن سنگھ بیدی طویل مدت سے بیمار چل رہے تھے۔ وہ اپنے دور کے عظیم اسپن گیندباز تھے اور 1967 سے 1979 کے درمیان ہندوستان کے لیے 67 ٹیسٹ میچ کھیلے جس میں 266 وکٹ لیے۔ انھوں نے ہندوستان کے لیے 10 یک روزہ میچ بھی کھیلے جن میں 7 وکٹ لیے۔

واضح رہے کہ بشن سنگھ بیدی، ایراپلی پرسنا، بی ایس چندرشیکھر اور ایس وینکٹ راگھون ایک وقت ہندوستانی اسپن گیندبازی کی جان ہوا کرتے تھے۔ بشن سنگھ بیدی نے ہندوستان کے لیے پہلا یک روزہ میچ جیتنے میں اہم کردار نبھایا تھا۔ امرتسر میں پیدا ہوئے بشن سنگھ بیدی نے گھریلو سرکٹ میں دہلی کی نمائندگی کی۔ انھوں نے گھریلو کرکٹ میں 370 میچوں میں 1560 وکٹ لیے۔