”اگر کوئی ہندوستان کو چھیڑے گا تو وہ چھوڑے گانہیں“، راج ناتھ سنگھ کا چین کو سخت پیغام
واشنگٹن، 16؍ اپریل (ایس او نیوز؍ایجنسی) چین کو ایک سخت پیغام دیتے ہوئے راج ناتھ سنگھ نے کہا کہ اگر کوئی ہندوستان کو نقصان پہنچاتا ہے تو اسے بخشا نہیں جائے گا- اس کے ساتھ انہوں نے زور دے کر کہا کہ ہندوستان، وزیر اعظم نریندر مودی کی قیادت میں ایک طاقتور ملک کے طور پر ابھرا ہے اور دنیا کی تین اعلیٰ معیشتوں میں سے ایک بننے کیلئے تیار ہے-
سنگھ نے سان فرانسسکو میں ہندوستانی- امریکی کمیونٹی سے خطاب کرتے ہوئے امریکہ کو ایک پیغام بھی دیا کہ ہندوستان’زیرو سم گیم‘ ڈپلومیسی پر یقین نہیں رکھتا اور ایک ملک کے ساتھ اس کے تعلقات دوسرے ملک کی قیمت پر نہیں ہو سکتے ہیں - ایک ’زیرو سم گیم‘ ایک ایسی صورتحال ہے جس میں ایک فریق کا نقصان دوسرے فریق کے فائدے کے برابر ہوتا ہے-
وزیر دفاع واشنگٹن ڈی سی میں ہندوستان اور امریکہ کے درمیان’ٹو پلس ٹو‘ وزارتی مذاکرات میں شرکت کیلئے یہاں آئے تھے- اس کے بعد انہوں نے ہوائی اور پھر سان فرانسسکو کا سفر کیا-سنگھ نے جمعرات کو سان فرانسسکو میں ہندوستانی قونصلیٹ کے ذریعہ اپنے اعزاز میں منعقدہ ایک تقریب سے خطاب کرتے ہوئے، چین کے ساتھ سرحد پر ہندوستانی فوجیوں کی طرف سے دکھائی گئی بہادری کا حوالہ دیا-