ہبلی ، 23/ستمبر (ایس او نیوز/ایجنسی)  سری رام سینا  لیڈر پرمود متالک کا ایک بار پھرمبینہ طور پر اشتعال انگیز بیان دینے اور ماحول کو خراب کرنے کی کوشش کا معاملہ سامنے آیا ہے۔بتاتے چلیں کہ ہبلی  میں گذشتہ سال کی طرح اِس بار بھی ہبلی عیدگاہ میں گنیش مورتھی بٹھائی گئی تھی، جس کو  لے کر  پرمود متالک نے کہا کہ  ہم آنے والے دنوں میں مساجد میں بھی گنیش مورتی بٹھائیں گے۔ میڈیا رپورٹوں کے مطابق  اس بیان کے بعد پرمود متالک کے خلاف کیس درج کر لیا گیا ہے۔

متالک پر الزام  ہے کہ اس نے مذاہب کے درمیان نفاق  پیدا کرنےاور ان کے مذہبی جذبات کو ٹھیس پہنچانے کی کوشش کی ہے ، شہر کے ماحول کو بگاڑنے کے مقصد سے یہاں اس طرح کا بیان دیا ہے، اس سلسلہ میں ہبلی میں سٹی کارپوریشن 8 ویں زون کے اسسٹنٹ کمشنر چندر شیکھر گوڈا نے ہبلی پولیس تھانہ میں دفعہ153(اے) ، 295 (اے) اور آئی پی سی کی دفعات کے تحت کیس درج کر لیا ہے۔

میڈیا رپورٹوں کے مطابق  ہبلی عیدگاہ میدان میں گنیش و سرجن سے قبل منعقدہ پروگرام کے لئے مدعو کئے گئے پر مود متا لک نے میڈیا والوں سے ملاقات کے ساتھ بات چیت کرتے ہوئے  کہا  کہ جو لوگ گنیش مورتی بٹھانے کی مخالفت کرتے ہیں، وہ ملک دشمن ہیں، انجمن اسلام کمیٹی کے لوگ نیچ  ہیں، ہم آگے مسجد کے اندر بھی گنیش کی مورتی بٹھائیں گے، اس کی ہمیں طاقت ہے، یہاں کے مسلمانوں کو اس عید گاہ میدان میں نماز کی اجازت نہ دینے عدالت میں مقدمہ دائر کریں گے، یہ پاکستان نہیں  ہے ، نہ ہی افغانستان  ہے، یہ ان کے با پ کی جاگیر نہیں ہے۔

یاد رہے کہ ہبلی عیدگاہ میدان میں انجمن اسلام نے گنیش کی مورتی  کی تنصیب کی مخالفت کی تھی اور ہائی کورٹ کا دروازہ کھٹکٹایا تھا،  لیکن  عدالت نے  درخواست مسترد کی تھی   جس کے بعد ہبلی  سٹی میونسپل کارپوریشن   نے عید گاہ کے میدان  میں ہندتوا  تنظیموں کو  تین دن تک گنیش اُتسو منانے کی اجازت دی تھی۔   

مسلم  تنظیموں کے قائدین اور کانگریس کارکنوں نے ہبلی۔ دھارواڑ پولیس کمشنر رینوکا کمار کو ایک شکایت پیش کی ہے، جس میں مطالبہ کیا گیا ہے کہ سری رام سینا کے پرمود متالک اور ان کے کارکنوں کو اشتعال انگیز بیان دینے کے بعد تڑی پار کیا جائے ۔