ہوناور تجارتی بندرگاہ تنازعہ : کاسرکوڈ کے ماہی گیر کریں گے پارلیمان الیکشن بائیکاٹ
ہوناور 16 / مارچ (ایس او نیوز) کاسرکوڈ ٹونکا میں تجارتی بندرگاہ تمیر کرنے کا مجوزہ منسوخ کرنے اور مقامی ماہی گیروں پر دائر کیے گئے مقدمات واپس لینے کا مطالبہ پورا نہ ہونے کی صورت میں یہاں کے ماہی گیروں نے پارلیمانی الیکشن کے بائیکاٹ کا فیصلہ کیا ہے ۔
ماہی گیروں کے لیڈر راجیش تانڈیل اور حمزہ پٹیل نے بیان جاری کرتے ہوئے بتایا کہ کاسرکوڈ میں سماج کے مختلف طبقات اور مختلف ماہی گیروں تنظیموں سے تعلق رکھنے والے لیڈروں کی موجودگی میں منعقدہ اجلاس میں شریک ہزاروں ماہی گیروں نے متفقہ طور پر یہ تجویز منظور کی ہے کہ ماہی گیروں کا ایک وفد وزیر برائے ماہی گیری و اندرونی بحری نقل و حمل منکال وئیدیا کی رہنمائی میں ریاستی وزیر اعلیٰ سدا رامیا سے ملاقات کرے گا اور اپنے مطالبات پھر ایک مرتبہ حکومت کے سامنے رکھے گا ۔
اجلاس میں کیے گئے فیصلے کے مطابق اگر حکومت ماہی گیروں کے وفد کے ساتھ بات چیت کرکے ان کے مطالبات پورے نہیں کرتی تو پھر ماہی گیروں کی طرف سے آنے والے پارلیمانی الیکشن کا بائیکاٹ کرنے اور آئندہ کی جد وجہد کے بارے میں لائحہ عمل طے کرنے کی کارروائی کی جائے گی ۔
ماہی گیروں کے اجلاس میں راجیش تانڈیل ٹونکا، حمزہ پٹیل ٹونکا، مامو صاب ٹونکا، گجانن تانڈیل رام نگر، ہنومنتا تانڈیل، اسٹیون فرنانڈیز، پیٹر فرنانڈیز ٹونکا اور دیگر لیڈران اسٹیج پر موجود تھے ۔