بھٹکل میں طوفانی ہواوں کے ساتھ زوردار بارش؛ کئی درخت اُکھڑ گئے، الیکٹرک ٹرانسفارمر سمیت کئی کھمبوں کو نقصان؛ بجلی کی انکھ مچولیاں
بھٹکل 4 اگست (ایس او نیوز) بھٹکل میں آج منگل صبح سے طوفانی ہواوں کے ساتھ زور دار بارش کے نتیجے میں کئی علاقوں میں درختوں کے اُکھڑنے کے ساتھ ساتھ بجلی کے کھمبوں کے گرنے اور کئی مقامات پر الیکٹرک ٹرانسفارمر کو نقصان پہنچنے کی اطلاعات موصول ہوئیں جس کی وجہ سے پورا دن بجلی کی انکھ مچولیاں جاری رہیں۔
موسلادھار بارش سے ویسے تو شہر میں پانی جمع ہونے کے فوری بعد خالی ہوتا ہوا نظر آیا مگر مضافاتی علاقوں میں پانی جمع ہوجانے سے کئی علاقے تالاب میں تبدیل ہوتے نظر آئے۔
زوردار بارش سے ایک طرف شرالی جنتاودیالیہ اسکول کے باہر نیشنل ہائی وے پر کثیر مقدار میں پانی جمع ہوجانے سے سواریوں کو گذرنے میں دشواری پیش آئی۔ تو وہیں بینگرے، مرڈیشور میں بھی راستوں پر پانی جمع ہوجانے کی اطلاع ملی۔
تعلقہ کے بینندورسمیت کئی مضافاتی علاقوں میں 14 سے زائد بجلی کے کھمبے گرنے کے ساتھ ساتھ دو ٹرانسفارمر کو بھی شدید نقصان پہنچنے کی اطلاع ملی اور محکمہ ہیسکام کے مطابق پانچ لاکھ سے زائد کا نقصان ہوا۔
کچھ علاقوں میں مکانوں پر درخت گرنے سے نقصان ہونے کے ساتھ ساتھ بعض جگہوں پر کمپاونڈ کی دیوار گرنے کی بھی اطلاعات ملی۔
محکمہ موسمیات کے مطابق پیر صبح آٹھ بجے سے منگل صبح آٹھ بجے تک بھٹکل میں 84 ملی میٹر بارش ریکارڈ کی گئی۔ محکمہ موسمیات کی مانیں تو اگلے چوبیس گھنٹوں میں بھٹکل میں تیز سے کافی تیز بارش ہونے کی پیشن گوئی کی گئی ہے۔