کاروار پولیس کلیان منٹپ میں گروہہ لکشمی اسکیم کا افتتاحی پروگرام - ضلع انچارج وزیر وئیدیا نے کہا : بی جے پی کی تنقید کے باوجود ہم نے گارنٹی اسکیموں کو گھر گھر پہنچایا
کاروار،31 / اگست (ایس او نیوز) شہر کے کاجو باغ میں واقع پولیس کلیان منٹپ میں ریاستی حکومت کی گروہہ لکشمی اسکیم کا آغاز کرتے ہوئے ضلع انچارج اور وزیر برائے ماہی گیری منکال وئیدیا نے کہا کہ جب ہم الیکشن کے موقع پر لوگوں کے دروازے تک گارنٹی کارڈس پہنچا رہے تھے تو اُس وقت بی جے پی والوں نے اس پر سوال کھڑے کیے تھے ، مگر ریاستی کانگریسی حکومت نے اپنا وعدہ پورا کرتے ہوئے اب تک تین گارنٹیوں کا آغاز کرنے میں کامیابی حاصل کی ہے اور اب چوتھی گارنٹی کا آغاز کیا جا رہا ہے ۔
اب جب کہ گارنٹیوں کو عملاً شروع کیا جا چکا ہے تب بھی بی جے پی والے اس پر تنقید کر رہے ہیں اور ریاستی حکومت مالی طور پر دیوالیہ ہوجانے کی بات کہہ رہے ہیں ۔ ریاستی حکومت کے پاس فنڈ کی کمی نہیں ہے ۔ بی جے پی نے ریاست کا جو دیوالیہ نکالا تھا اس کو ہم سدھارنے کا کام کر رہے ہیں ۔ بی جے پی کے دور کا قرضہ ادا کر رہے ہیں ۔ کم از کم اب تو بی جے پی کو کانگریسی حکومت پر تنقید کرنے کے بجائے ترقی کے عمل میں تعاون کرنا چاہیے۔
منکال وئیدیا نے کہا کہ گروہہ لکشمی اسکیم لاگو کرنے کے سلسلے میں محکمہ جاتی افسران کی محنت اور دلچسپی اس بات سے ثابت ہوتی ہے کہ ریاست کے 31 اضلاع میں ضلع اتر کنڑا کا مقام 10 ویں نمبر پر ہے ۔ ریاستی حکومت کا منشاء یہ ہے کہ ریاست میں کوئی بھی شخص بھوکا نہ رہے اس لئے انّا بھاگیہ اسکیم لاگو کی جا رہی ہے جس کے تحت فی کس پانچ کلو چاول دیا جا رہا ہے اور مزید 5 کلو چاول کے بدلے اس کی رقم گھر والوں کے کھاتے میں جمع کروائی جا رہی ہے ۔ الیکٹرک بل بھرنے کا بوجھ کم کرنے کے لئے مفت بجلی فراہم کرنے کی اسکیم لاگو کی گئی ہے ۔ کام دھندے پر جانے والی خواتین کے لئے آسانی کے مقصد سے بس میں مفت سفر کرنے کی سہولت جاری کی جا چکی ہے ۔ اس طرح ہماری ماوں اور بہنوں کو ریاستی حکومت نے سہولتیں فراہم کی ہیں ۔ ہماری حکومت عوام کو سہولت فراہم کرنے کی پابند ہے اور اس کے لئے وضع کردہ اسکیموں کو لاگو کیا جا رہا ہے ۔ اب صرف ودیا نیدھی اسکیم باقی ہے جسے جلد ہی جاری کیا جائے گا ۔
اس پروگرام کی صدارت کرتے ہوئے رکن اسمبلی ستیش سائل نے کہا کہ کانگریس کی طرف سے گارنٹی جاری کرنے کے وعدے پر بی جے پی والوں نے بہت سے تبصرے کیے تھے ۔ لیکن حکومت بنتے ہی اسکیموں کو باضابطہ طور پر لاگو کرنے کا سلسلہ شروع کیا گیا ۔ اُس وقت اس پر تنقید کرنے والوں کو اب ایک مرتبہ خود ہی غور کرنا چاہیے ۔ اس طرح گارنٹیوں کو لاگو کرنا کانگریسی حکومت کے سوا کسی سے بھی ممکن نہیں ہے ۔ ضلع میں بہت سارے ترقیاتی منصوبوں پر عمل ہو رہا ہے ۔ میڈیکل کالج اسپتال کو سوپر اسپیشالٹی ہاسپٹل میں تبدیل کیا جا رہا ہے ۔ آنے والے دنوں میں کمٹہ یا ہوناور میں سوپر اسپیشالٹی ہاسپٹل قائم کیا جائے گا ۔
پروگرام کے دوران علامتی طور پر چار خواتین کو گروہہ لکشمی اسکیم کے لئے رجسٹریشن کی سند سونپی گئی ۔ اس سے قبل ضلع رنگ مندر کے پاس سے نکلنے والے جلوس کو ڈپٹی کمشنر گنگو بائی نے ہری جھنڈی دکھائی ۔ جلوس میں سیدّی اور دوسرے طبقے کے لوگوں نے ثقافتی جھلکیاں پیش کیں ۔