لوک سبھا انتخابات؛ ووٹر لسٹ میں نام داخل کرنے کے لئے ابھی بھی وقت باقی ہے
بینگلورو 19 / مارچ (ایس او نیوز) چیف الیکٹورل آفیسر کی طرف سے جاری بیان کے مطابق پارلیمانی الیکشن میں ووٹ دینے کے اہل افراد کو اپنا نام ووٹر لسٹ میں شامل کروانے کے لئے ابھی مہلت باقی ہے جس سے فائدہ اٹھایا جا سکتا ہے ۔
بتایا گیا ہے کہ امیدوار کی طرف سے پرچہ نامزدگی داخل کرنے کی جو آخری تاریخ ہے اس سے دس دن پہلے تک ووٹر لسٹ میں نیا نام داخل کرنے یا پھر پہلے سے موجود کسی نام میں ترمیم ، تنسیخ یا تبدیلی کی کارروائی انجام دی جا سکتی ہے ۔
جنوبی کرناٹکا کی 14 نشستوں کے لئے 26 اپریل کو الیکشن ہوگا جس کے لئے ووٹر لسٹ میں ناموں کے اندراج یا اخراج و ترمیم کے لئے آخری تاریخ 25 مارچ ہوگی جبکہ شمالی کرناٹکا کی 14 نشستوں کے لئے 7 مئی کو انتخابات ہونگے اور یہاں ووٹر لسٹ میں نام داخل کرنے کی آخری تاریخ 19 اپریل ہوگی ۔
اگر کسی ووٹر نے اپنا نام ووٹر لسٹ میں داخل کروایا ہے ، لیکن اسے ووٹر آئی ڈی کارڈ نہیں ملا ہے، تب بھی اسے ووٹ دینے کا حق حاصل رہے گا ۔ ایسے شخص کو پولنگ کے دن سرکار کی طرف سے تصدیق شدہ 12 شناختی دستاویزات میں سے کوئی ایک دستاویز اپنے ساتھ لانا ہوگا ۔ ان دستاویزات کی فہرست الیکشن کمیشن کے ویب سائٹ پر دستیاب ہے ۔
ووٹر لسٹ میں کسی کا نام شامل رہنا کافی ہے ۔ اس کا اسکرین شاٹ لینا ہوگا اور اسے پولنگ اسٹیشن میں دکھانا ہوگا ۔ پرنٹ آوٹ کو جائز ثبوت نہیں مانا جائے گا ۔ ووٹر آئی ڈی کارڈ ہاتھ میں نہ رہنے والوں کے لئے دوسرا منظور شدہ آئی ڈی پروف دکھانا لازمی ہوگا ۔ احتیاطی طور پر کوئی تصدیق شدہ سرکاری شناختی ثبوت اپنے ساتھ لے جانا زیادہ بہتر ہوگا ۔ ووٹرس اپنا E-EPIC ڈاونلوڈ کرکے بھی الیکشن آفیسرس کو دکھا سکتے ہیں، البتہ پرنٹ آوٹ کو جائز ثبوت نہیں مانا جائے گا ۔
ہر ووٹر کو چاہیے کہ الیکشن میں ووٹ ڈالنے کے لئے جانے سے قبل ووٹر لسٹ میں اپنی تفصیلات دیکھ لے جو کہ ووٹر ہیلپ لائن ایپ یا پھر ویب سائٹ پر دستیاب ہے ۔ کیونکہ صرف ووٹر آئی ڈی کارڈ آپ کے پاس ہونا آپ کا نام موجودہ ووٹر لسٹ میں شامل رہنے کی ضمانت نہیں ہے ۔