مسقط میں 20 اکتوبر کو ہوگا بھٹکل مسلم اسوسی ایشن کا گانویں ملن؛ بچوں کے ہوں گے دلچسپ ڈرامے؛ ساحل آن لائن پر ہوگا لائیو ٹیلی کاسٹ
مسقط 18اکتوبر (ایس او نیوز) جمعرات 20/اکتوبر کو بھٹکل مسلم اسوسی ایشن مسقط کے زیراہتمام سالانہ گیٹ ٹوگیدر پروگرام گانویں ملن کا انعقاد کیا گیا ہے جس میں بچوں کے دلچسپ اور سبق آموز ڈرامے اور مکالمے ہوں گے، ساتھ ساتھ حیدرآبادی کامیڈین اکبربن تبر، شہباز خان اور عاطف خان تفریحی شو پیش کریں گے۔
گانویں ملن گیٹ ٹوگیدرکے کنوینرعبدالباری ایس پی نے بتایا کہ پروگرام جمعرات شب ٹھیک 8:00 بجے روی کے گولڈن ٹولیپ ہوٹل میں رات کی ضیافت سے شروع ہوگا۔ ٹھیک نو بجے اسٹیج سجے گا۔ جس کی صدارت جماعت کے صدر نثار احمد ایم جے کریں گے۔ پروگرام میں مہمان خصوصی کے طور پر بھٹکل مسلم خلیج کونسل کے سکریٹری جنرل جناب عتیق الرحمن مُنیری، کینرا مسلم خلیج کونسل کے صدر جناب یونس قاضیاء اور نائب صدر ابومحمد مختصرمدعو کئے گئے ہیں۔
گانویں ملن میں جماعت کے ترانہ کا اجراء بھی ہوگا، جسے مولانا سمعان خلیفہ ندوی نے لکھا ہے۔جبکہ اسے بہترین آواز کے مالک زُفیف شینگیری اپنی سُریلی اور طاقتور آواز میں گاکرسنائیں گے۔ یہ دونوں بھی خصوصی طور پر بھٹکل سے پروگرام میں شریک ہوں گے۔
مسقط میں منعقد ہونے والے گیٹ ٹوگیدر پروگراموں میں بچوں کے ڈرامے اور مکالمے نہایت دلچسپ ہوتے ہیں، اس کے ساتھ ساتھ بچوں کی طرف سے نعت، نظمیں اوردیگرچُٹکلے بھی پیش ہوں گے اور توقع ہے کہ بچوں کی طرف سے پیش کئے گئے پروگراموں سے سامعین خوب لطف اندوز ہوں گے۔
گذشتہ سالوں کی طرح اس بار کے گیٹ ٹوگیدر میں بھی مسقط میں تعلیم حاصل کرنے والے ہونہار بچوں کو ایوارڈ اور تہنیت سے نوازتے ہوئے ان کی ہمت آفزائی کی جائے گی۔ تعلیمی ایوارڈ کے تعلق سے جماعت کے سرگرم رکن خواجہ فوزان محتشم نے بتایا کہ کووڈ کی وجہ سے گذشتہ دو سال گیٹ ٹوگیدر پروگرام کا انعقاد نہیں کیا جاسکا تھا، اس بناء پر امسال کے پروگرام میں گذشتہ دو سالوں کے رینک ہولڈروں کی بھی تہنیت کی جائے گی۔ جبکہ ریفل ڈراء کے ذریعے ممبران جماعت کواسکوٹی، سونے کی گنیاں اور دیگر ڈھیر سارے انعامات تقسیم کئے جائیں گے۔
جماعت کے جنرل سکریٹری سید حُسین برماور نے اراکین جماعت سے درخواست کی ہے کہ وہ اس پروگرام میں وقت پر شریک ہوکر گانویں ملن کو کامیاب بنانے میں ہرممکن تعاون کریں۔
خیال رہے کہ پورا پروگرام ساحل آن لائن پر لائیو ٹیلی کاسٹ کیا جائے گا۔ عوام الناس سے درخواست ہے کہ وہ ساحل آن لائن یوٹیوب چینل http://youtube.com/sahilonlinevideo کو کلک کرکے پہلی فرصت میں سبسکرائب والے بٹن کو دبائیں۔
