بھٹکل سمیت ساحلی کرناٹکا میں زبردست گرمی ؛ 26مئی سے اگلے تین دنوں تک کرناٹکا میں زبردست بارش کے امکانات
بھٹکل :26؍مئی(ایس اؤ نیوز) بھٹکل سمیت ساحلی کرناٹکا میں گذشتہ دو تین دنوں سے زبردست گرمی سے عوام کا حال بے حال ہے، آج منگل کو بھٹکل میں 37 ڈگری سیلسیس گرمی ریکارڈ کی گئی ہے لیکن نمی بھی کافی زیادہ ہونے کی وجہ سے گرمی کی شدت 41 ڈگری سیلس سے بھی زائد جیسی محسوس ہورہی ہے ایسے میں دو تین دنوں سے ساحلی کرناٹک میں آسمانوں میں بادل چھائے ہوئے ہے، مگر دو ایک مرتبہ ہلکی بارش کو چھوڑ کر گرمی کو دور کرنے جیسی بڑی بارش نہیں ہوئی ہے۔
مگر اب محکمہ موسمیات نے اس بات کا امکان جتایا ہے کہ بحرہ عرب اور خلیج بنگال میں طوفانی ہواؤں سے پیدا ہونے والے دباؤ کے نتیجے میں ریاست کرناٹک کے جنوبی اندرونی علاقوں اور ساحلی پٹی پر 26مئی سے اگلے تین دنوں تک زبردست بارش ہوسکتی ہے۔۔
جنوبی اندرونی علاقے چک مگلورو اور ہاسن میں منگل کو زیادہ بارش کے امکانات کو دیکھتے ہوئے ‘یلو الرٹ ‘ کا بھی اعلان کیاگیا ہے۔اسی طرح مئی 27کو بنگلورو شہر، بنگلورو کے دیہی علاقے ، چامراج نگر ، منڈیا، میسور ، رام نگر میں زبردست بارش ہونے کے امکانات ظاہر کئے گئے ہیں۔ اسی طرح ٹمکور، میسور، رام نگر اور چامراج نگر میں 28مئی کو آرینج الرٹ کا اعلان کیاگیا ہے۔
کرناٹکا سماوی آفات نگراں کار مرکز کے ڈائرکٹر ڈاکٹر شری نواس ریڈی نے بتایا کہ امسال جون کے پہلے ہفتہ میں ہی مانسون کی شروعات ہوگی۔ اس سے پہلے ماقبل مانسون کی بارش ہوگی۔ پیر کو منڈیا ضلع ہنوکیرے اور برسالی میں 5سنٹی میٹر بارش ہوئی ہے۔ بنگلوروشہر، کے آر پیٹ، ہاسن ، منڈیا ، میسور میں 3س م ۔ ٹی نرسی پور ، سرگورو اور پیریا پٹن میں ایک ایک سنٹی میٹر بارش ہوئی ہے۔ میسور میں ہوئی بارش کے نتیجے میں قریب 8مقامات پر درخت گرنے سے سڑکوں پر آمد ورفت بند ہوگئی تھی ۔
اُدھر کلبرگی میں اتنی شدت کی گرمی پائی جارہی ہے کہ درجہ حرارت 44.1 ڈگری سلسیس ریکارڈ کی گئی ہے۔