مرڈیشور میں چار سیاحوں کی سمندر میں غرق ہونے کے دوران لائف گارڈس نے بچائی جان
بھٹکل:8؍اکتوبر(ایس اؤ نیوز) مشہور سیاحتی مقام مرڈیشور میں سمندری لہروں کی زد میں آکر غرق ہونے کے دوران چار سیاحوں کو لائف گارڈس کے اہلکار بچانے میں کامیاب ہوگئے یہ واردات منگل کی شام کو پیش آئی۔ زندہ بچ کر واپس آنے والوں میں دو لڑکیاں بھی شامل ہیں
مرڈیشور پولس نے بتایا کہ گدگ سے آٹھ افراد کی ایک ٹیم آج مرڈیشور پہنچی تھی جب یہ لوگ سمندر میں تیراکی کررہے تھے تو اچانک چار لوگ سمندری لہروں کی زد میں آکر غوطے کھاتے ہوئے ساحل سے دور چلے گئے ، جب یہ لوگ غرق ہونے لگے تو فوری طور پر ساحل پر تعینات لائف گارڈس کا عملہ ان کی مدد کو پہنچ گیا ۔
لائف گارڈس کے اہلکاروں نے چاروں کو سمندر میں ڈوبنے کے دوران بچاتے ہوئے کنارے لے کر آئے۔ موت کے منہ سے زندہ بچ کر نکلنے کے بعد ابتدائی کچھ وقت تک غالباً ڈر اور خوف کے مارے ان کی حالت کافی خراب تھی۔
چاروں کی شناخت کاویا، پلّوی، چندرشیکھر اور بسورا ج کی حیثیت سے کی گئی ہے۔ لائف گارڈس کے عملہ میں جئے رام، شریکانت، روی اور چندرشیکھر موجود تھے ۔
بتایا گیا ہے کہ اسی طرح کا ایک واقعہ ایک روز قبل یعنی پیر 7ستمبر کو بھی پیش آیا تھا جس میں بنگلورو کے 3سیاح سمندر میں تیررہے تھے جس کے دوران ایک سیاح سمندری لہروں کی زد میں آگیا تھا، مگر لائف گارڈس کے اہلکاروں نے اُسے عین وقت پر ڈوبنے سے بچالیا۔